რადიკალური ოპოზიციის კანდიდატები, რომლებიც ერთმანეთისგან არ განსხვავდებიან, აღჭურვილები არიან კონკრეტული პოლიტიკური პოზიციით და ამოცანით - როგორმე საშუალება არ მისცენ და ხელი არ შეუწყონ კანდიდატებთან დაკავშირებით კონსენსუსის მიღწევას, - ამის შესახებ პარლამენტის პირველმა ვიცე-სპიკერმა გია ვოლსკიმ სახალხო დამცველის კანდიდატების შეფასებისა და ომბუდსმენის არჩევის პროცესთან დაკავშირებით განაცხადა.
ვოლსკიმ იმედი გამოთქვა, რომ გამოჩნდება კანდიდატურა, რომლის ირგვლივ უმრავლესობასა და ოპოზიციას ერთიანი პოზიცია ექნება, თუმცა ის დარწმუნებული არ არის, რომ ოპოზიცია მოინდომებს, მსოფლიო საზოგადოებას დაანახოს, რომ ქართულ პოლიტიკაში კონსენსუსი შესაძლებელია.
„მათი წარსული აქტივობიდან და დღევანდელი პოზიციიდან გამომდინარე, რაც გასაუბრების დროს გამოავლინეს, მხოლოდ ერთი რამ იკითხება, შეარჩიეს კანდიდატები, რომელთა გარშემო არ შეიძლება შეთანხმების მიღწევა. არსებობენ, რასაკვირველია, საინტერესო კანდიდატებიც, ვისაც ხელეწიფება გარკვეული სამსახური გაუწიოს თავის ქვეყანას. მაგრამ, ფაქტია, რომ არასამთავრობო სექტორში კადრების მომზადება არ არის ჯეროვანი. ამ სფეროს უნდა განეკუთვნებოდნენ ადამიანები, რომლებმაც თავისი სფეროები მაღალ დონეზე იციან, ეხება ეს ეკონომიკას, სოციალურ საკითხებს, თუ ადამიანის უფლებებს, ამავე დროს, მიუკერძოებლები არიან და სახელმწიფოს ემსახურებიან და არა რომელიმე პოლიტიკურ პარტიას. კიდევ ერთხელ, პოლიტიკურმა სულისკვეთებამ, რაც რადიკალურმა ოპოზიციამ დაამკვიდრა პოლიტიკურ ველზე, საკმაოდ უარყოფითი გავლენა იქონია. მე იმედი მაქვს, რომ ამ ბჭობის შემდეგ, გამოჩნდება კანდიდატურა, რომლის ირგვლივ ექნება უმრავლესობასა და ოპოზიციას ერთიანი პოზიცია. მაგრამ აბსოლუტურად არ ვარ დარწმუნებული, რომ რადიკალური ოპოზიცია, მოინდომებს, მსოფლიო საზოგადოებას დაანახოს, რომ ქართულ პოლიტიკაში კონსენსუსი შესაძლებელია. ეს მათ პოლიტიკურ ინტერესებს ეწინააღმდეგება,“ - განაცხადა ვოლსკიმ.