დეოლიგარქიზაციის კანონს ე.წ. NGO სექტორი და რადიკალური ოპოზიცია აკრიტიკებს. მიზეზი არის ერთადერთი - მათ არ უნდათ დეოლიგარქიზაცია, - ამის შესახებ „ქართული ოცნების“ თავმჯდომარე ირაკლი კობახიძემ განაცხადა.
მისივე თქმით, ოპოზიციამ დეოლიგარქიზაციის შესახებ კანონს მხარი იმიტომ არ დაუჭირა, რომ ოლიგარქიული გავლენები მათ პოლიტიკურ პარტიებშია.
„ეს კანონი მიიღეს უკრაინაში. თავის დროზე ამ კანონის მიმართ არავითარი კრიტიკა არ ყოფილა. ჩვენ ეს კანონი გადმოვაქართულეთ და ვხედავთ, რომ ამას ე.წ. NGO სექტორი და ასევე რადიკალური ოპოზიცია აკრიტიკებს. მიზეზი არის ერთადერთი - მათ არ უნდათ დეოლიგარქიზაცია. ისინი ხედავენ, რომ ერთადერთი, სადაც არის ოლიგარქიული გავლენები, ეს არის მათი პოლიტიკური პარტია -„ნაცმოძრაობა“, ვაშაძე-ჯაფარიძე-ხოშტარიას „ტროიკა“. ოლიგარქიული გავლენები მხოლოდ იქ არის. აქედან გამომდინარე, მათ დეოლიგარქიზაცია არ უნდათ და შესაბამისად, დეოლიგარქიზაციის შესახებ კანონი არ უნდათ. ყველაფერი დანარჩენი არის სპეკულაცია. ამიტომ არ დაუჭრეს მხარი ამ კანონს,“ - განაცხადა ირაკლი კობახიძემ.