მიხეილ სარჯველაძე - ისეთი მოკლეფეხებიანი ტყუილი, როგორიცაა სააკაშვილის მოწამვლის შესახებ ინფორმაცია, დიდხანს ვერ გაძლებს - თავადაც გადასარევად იცის, რომ ამაზე აპელირებას პერსპექტივა არ აქვს

ისეთი მოკლეფეხებიანი ტყუილი, როგორიცაა ის, რომ მიხეილ სააკაშვილი მოწამლულია, დიდხანს ვერ გაძლებს - თვითონაც გადასარევად იცის, რომ ამ თემაზე აპელირებას პერსპექტივა არ აქვს,- ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძემ ჟურნალისტებს განუცხადა, რითაც გამოეხმაურა მიხეილ სააკაშვილის ადვოკატების ვერსიას, რომ სააკაშვილი მოწამლულია და თავად სააკაშვილის განცხადებას, რომ აღნიშნულ საკითხზე სპეკულაციები უადგილოა.

როგორც მიხეილ სარჯველაძე აცხადებს, მოწამვლის შესახებ ვერსია საფუძველშივე მცდარია და სააკაშვილიც ამიტომაა იძულებული თქვას, რომ „ეს არის მტკნარი ტყუილი“.

„როდესაც საკითხი საექსპერტო ცოდნაზეა დაყვანილი, ისეთი მოკლეფეხებიანი ტყუილი, როგორიცაა ის, რომ მოწამლულია, დიდხანს ვერ გაძლებს და ეს გამოაშკარავებადია. ამიტომ, თვითონაც [მიხეილ სააკაშვილმა] გადასარევად იცის, რომ ამ თემაზე აპელირებას პერსპექტივა არ აქვს, რადგან საფუძველშივე მცდარია და ეს ვერსია ერთი კვირის განმავლობაშიც კი ვერ იარსებებს. ამიტომ იძულებულია თქვას, რომ ეს არის მტკნარი ტყუილი, ვიღაცების მხრიდან მოგონილი“,- განაცხადა მიხეილ სარჯველაძემ.

მისივე თქმით, მიხეილ სააკაშვილს ყველა სამედიცინო მომსახურებაზე, რომელიც ესაჭიროება, ხელი მიუწვდება.

„სპეკულაციებს ყველამ თავი უნდა დაანებოს - მიკერძოებული დასკვნების კეთება ყურადღების მიღმა არ დარჩება. როდესაც ექსპერტობაზე თავს დებენ და საკუთარ სავარაუდო, სასურველ მოსაზრებებს საექსპერტო დასკვნების სახით ასახავენ, ეს არასწორი პრაქტიკაა.

არასწორია კითხვა, გააუმჯობესებს თუ არა ხელისუფლება სამედიცინო მომსახურებას - ამ დრომდეც ყველა სამედიცინო მომსახურებაზე, რომელიც შეიძლება ჩავთვალოთ რომ პაციენტს ან პატიმარს ესაჭიროება, ყველაფერზე მიუწვდება ხელი“, - განაცხადა მიხეილ სარჯველაძემ.

ცნობისთვის, რამდენიმე დღის წინ, მესამე პრეზიდენტის, მიხეილ სააკაშვილის ადვოკატმა, ვალერი გელბახიანმა განაცხადა, რომ მიხეილ სააკაშვილი მოწამლულია. როგორც ადვოკატი განმარტავს, მოწამვლის შესახებ ეჭვი დიდი ხნის წინ თავად მიხეილ სააკაშვილსაც ჰქონდა.

თუმცა, დღეს მიხეილ სააკაშვილის „ფეისბუქ“ გვერდზე განცხადება გავრცელდა, სადაც სააკაშვილი ამბობს, რომ არასდროს არცერთი ადვოკატისთვის არ უთქვამს, რომ მოწამვლაზე ეჭვი აქვს. „სპეკულაციები ამ თემაზე უადგილოა“,- აცხადებს სააკაშვილი.

კახა გოგოლაშვილი - ევროპარლამენტი საქართველოს ევროკავშირში ინტეგრაციის შესაძლებლობას ზრდის, ახლა ჯერი ჩვენზეა
ქართული პრესის მიმოხილვა 02.12.2022
დავით სიხარულიძე - ისტორიას არ ახსოვს, რომ რომელიმე ქვეყანა ძალით ნატო-ში, ან ევროკავშირში მიეღოთ
„ასტრაზენეკამ“ პროექტის „თანადგომა“ შემაჯამებელი ღონისძიება გამართა
ღვინო, რომელიც ბედნიერებას იმახსოვრებს - „მარნაველი“ - CBS ჯგუფის ახალი მიმართულება და 2022 წლის წარმატება ღვინის ბიზნესში
„კარფური" გაფართოებას აგრძელებს - თბილისში ახალი სუპერმარკეტი გაიხსნა
„ნიუ ჰოსპიტალსი“ აშშ-ის შეიარაღებული ძალების სამედიცინო სერვისების მომწოდებლად შეირჩა
გაფრთხილდი და გააფრთხილე, ჩვენი ფინანსების უსაფრთხოება ჩვენს ხელშია
„ლიბერთიმ“ განვადების აქცია დაიწყო
ბაზისბანკის ინვესტიციით, რუსთავში სავაჭრო ცენტრი და საცხოვრებელი კომპლექსი შენდება