„ქართული ოცნების“ დეპუტატის, რატი იონათამიშვილის განცხადებით, მმართველი გუნდი თავდაპირველად „დეოლიგარქიზაციის შესახებ“ ვენეციის კომისიაში გაგზავნილ უკრაინულ კანონთან დაკავშირებულ ვითარებაში გაერკვევა და ამის შესაბამისად მიიღებენ გადაწყვეტილებას მათ მიერ ინიცირებული კანონპროექტის ვენეციის კომისიაში გაგზავნის საკითხზე.

იონათამიშვილის თქმით, ვითარება უცნაური და უხერხულია.

„პრობლემა ვენეციის კომისიაში კანონპროექტის გაგზავნა- არგაგზავნაში კი არ არის, არამედ იმ უცნაურ და ერთმანეთის გამომრიცხავ განცხადებებშია, რასაც მთელი დღის განმავლობაში ვისმენდით. აშშ-ს ელჩმა თქვა, რომ უკრაინამ ვენეციის კომისიიდან კანონი გაიწვია და საქართველომ იგივე კანონი უნდა გაგზავნოს. ვენეციის კომისიამ თქვა, რომ ისინი მუშაობას აგრძელებენ, თუმცა ჯერ არ იციან, როდის ექნებათ დასკვნა მზად. ასევე მოვისმინეთ ხატია დეკანოიძის განცხადება, რომელიც უკრაინის მაღალჩინოსანი იყო - მან აღნიშნა, თითქოს უკრაინამ უკვე მიიღო პასუხები კომისიიდან და ახლა პასუხების დამუშავება მიმდინარეობს.

ერთი საკითხის ირგვლივ ამდენი ურთიერთგამომრიცხავი განცხადება ნამდვილად უცნაური და უხერხულია. ჩვენ პასუხისმგებლიანი დამოკიდებულებით ვეცდებით გავარკვიოთ, რა ხდება სინამდვილეში, საზოგადოების ინფორმირება უზრუნველვყოთ და მხოლოდ ამის შემდეგ მივიღოთ კონკრეტული გადაწყვეტილება“, - განუცხადა ჟურნალისტებს რატი იონათამიშვილმა.