ლევან იოსელიანი - პარლამენტის მიერ ორი მოსმენით მიღებული უკრაინული კანონპროექტი „დეოლიგარქიზაციის შესახებ“ არ ვარგა და ჩვენს რეალობას არ შეესაბამება - სინამდვილეში, ეს არის კანონი უფულო ოლიგარქების შესახებ

“ქართული ოცნების” მიერ ინიცირებული და პარლამენტის მიერ ორი მოსმენით მიღებული უკრაინული კანონპროექტი “დეოლიგარქიზაციის შესახებ“ არ ვარგა და ჩვენს რეალობას არ შეესაბამება - სინამდვილეში, ეს არის კანონი უფულო ოლიგარქების შესახებ, - ამის შესახებ პარლამენტის ოპოზიციონერი ვიცე-სპიკერი ლევან იოსელიანი სოციალურ ქსელში წერს.

მისივე შეფასებით, აღნიშნული კანონი იმ ხალხსაც დაჩაგრავს, ვინც ფული იშოვა, მაგრამ პოლიტიკა არ აინტერესებს.

“კანონპროექტის თანახმად, ფიზიკური პირი, რომელიც კანონში მითითებული კრიტერიუმებიდან სულ მცირე სამ პირობას ერთდროულად აკმაყოფილებს, მიიჩნევა ოლიგარქად.

კანონპროექტის თანახმად, ეს კრიტერიუმებია:

  1. პოლიტიკურ ცხოვრებაში მონაწილეობა;
  2. მასობრივი ინფორმაციის საშუალებებზე მნიშვნელოვანი გავლენის მოხდენა;
  3. ისეთი ბიზნესის ფლობა, რომელსაც ბაზარზე დომინანტური მდგომარეობა უკავია და ისეთი აქტივების ფლობა, რომლის ოდენობა 1 000 000-ჯერ აღემატება შრომისუნარიანი პირებისთვის დადგენილ საარსებო მინიმუმს.

განვიხილოთ ორი შემთხვევა: დავუშვათ ადამიანს არა აქვს ფული, მაგრამ ფლობს მცირე ბიზნესს, რომელსაც დომინანტური მდგომარეობა უკავია ბაზარზე. მაგალითად, მხოლოდ მას შემოაქვს ჰოლანდიური ტიტები საქართველოში და ამავე დროს, ფლობს რომელიმე მასობრივი ინფორმაციის საშუალებას, მაგალითად, რეგიონულ საინფორმაციო სააგენტოს, რომელიც მემკვიდრეობით მიიღო. ასეთ შემთხვევაში, ის აკმაყოფილებს ფორმალურ წინაპირობებს, რომ ოლიგარქთა რეესტრში მოხვდეს ანუ ოლიგარქად ვაცხადებთ უფულო ადამიანს, რაც დამეთანხმებით სრული ნონსენსია.

და მეორე: დავუშვათ ადამიანს აქვს ფული, აქვს ბიზნესი, რომლიც დომინანტურია ბაზარზე და ამასთან, რომელიმე მასობრივი ინფორმაციის საშუალების მესაკუთრეცაა, მაგრამ საერთოდ არ მონაწილეობს პოლიტიკურ ცხოვრებაში და არც აქვს ინტერესი. გაუგებარია, რატომ უნდა მოხდეს პოლიტიკისგან დისტანცირებული პირის ოლიგარქთა რეესტრში ჩარიცხვა და რატომ უნდა წარმოეშვას მას მაგალითად, ქონებრივი მდგომარეობის დეკლარაციის წარდგენის ვალდებულება ან რატომ უნდა აეკრძალოს ფართომასშტაბიანი ობიექტების პრივატიზაციის პროცესში მონაწილეობა. დამეთანხმებით ეს არასამართლიანი შეზღუდვაა და მხოლოდ ამ აპოლიტიკური “ოლიგარქის“ ბიზნესს საქმიანობას დააზარალებს.

ერთი რამ ცხადია, აღნიშნული კანონპროექტი დაწერილია სხვა ქვეყნისთვის, მისი კოპირება და მიღება ვერ უზრუნველყოფს დეოლიგარქიზაციის ვალდებულების შესრულებას, ვერ უზრუნველყოფს ეკონომიკურ, პოლიტიკურ და საზოგადოებრივ ცხოვრებაში პირადი ინტერესების გადაჭარბებული გავლენის აღმოფხვრას და ოლიგარქთა გადამეტებულ გავლენასთან დაკავშირებული საფრთხეების თავიდან აცილებას“, - აცხადებს ლევან იოსელიანი.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს