იმედი გვაქვს, რომ ცესკო-ს თავმჯდომარის კანდიდატურაზე კონსენსუსი იქნება, - ამის შესახებ ჟურნალისტებთან პრეზიდენტის ­საპარლამენტო მდივანმა, გიორგი მსხილაძემ განაცხადა.

მან იმედი გამოთქვა, რომ რომელიმე კანდიდატი ხმების იმ რაოდენობის დაგროვებას შეძლებს, რაც 5 წლის ვადით ასარჩევად საკმარისი იქნება.

„ჩვენ იმედი გვაქვს, რომ მოხდება კონსენსუსი, შეთანხმება და ხმების იმ რაოდენობის დაგროვებას შეძლებს რომელიმე კანდიდატი, რომ იმ 5 - წლიანი ვადით იყოს არჩეული ცესკო- ს თავმჯდომარედ, რომელიც კანონმდებლობით არის განსაზღვრული, წინააღმდეგ შემთხვევაში მივიღებთ ალბათ ისევ 6 თვით დანიშნულ თავმჯდომარეს“, - განაცხადა მსხილაძემ.

ცნობისათვის, ცესკოს თავმჯდომარის თანამდებობაზე ასარჩევად პრეზიდენტმა პარლამენტს თამარ ალფაიძის და რევაზ ეგაძის კანდიდატურები წარუდგინა. კანდიდატურებს დღეს იურიდიულ საკითხთა კომიტეტზე უსმენენ.

დღესვე იგეგმება ცენტრალური საარჩევნო კომისიის ორი წევრის თანამდებობაზე ასარჩევად წარმოდგენილი ლევან ისაკაძის, გიორგი მარსაგიშვილის, ქრისტინე ქაჯაიას და ნათია წიპტაურის კანდიდატურების მოსმენა.

საქართველოს პრეზიდენტმა სალომე ზურაბიშვილმა პარლამენტს ცესკოს თავმჯდომარეობის და წევრობის კანდიდატები ასარჩევად 5 აგვისტოს წარუდგინა.

კანონმდებლობის გათვალისწინებით, თუ ცესკოს თავმჯდომარე არჩეულია პარლამენტის სრული შემადგენლობის არანაკლებ ორი მესამედის უმრავლესობით, მისი უფლებამოსილების ვადაა 5 წელი, ხოლო სხვა შემთხვევაში − 6 თვე.