„დროას“ ლიდერი ელენე ხოშტარია საგანგაშოს უწოდებს „ქართული ოცნების“ წარმომადგენლების განცხადებას, რომ „სხვა ქვეყნის სამხედრო სამსახურში ყოფნა იწვევს საკუთარი ქვეყნის მოქალაქეობის დაკარგვას“.

როგორც ხოშტარიამ „ნაციონალური მოძრაობის“ ოფისში გამართული შეხვედრის შემდეგ ჟურნალისტებს განუცხადა, „ქართულ ოცნებას“ გმირების შეურაცხყოფა არ გაუვა.

„ეს არის უკიდურესად საგანგაშო განცხადება და კიდევ ერთი ნაბიჯი, რომელიც გვეუბნება, რომ გმირებს, რომლებიც თავს სწირავენ ჩვენი ქვეყნის უსაფრთხოებისთვის, პუტინთან ერთად ბიძინა ივანიშვილი უპირისპირდება. ამას თუ გაბედავენ, შესაბამისი დასკვნები და პასუხი იქნება. ამ გმირების შეურაცხყოფა საზოგადოების რეაქციის თვალსაზრისით „ქართულ ოცნებას“ ძვირი დაუჯდა. არ გაუვიდათ თავხედობა და დუმილი, კიდევ უფრო არ გაუვათ ამ ადამიანების შეურაცხყოფა“, - განაცხადა ელენე ხოშტარიამ.

რაც შეეხება უშუალოდ შეხვედრას, ხოშტარიას განცხადებით, განიხილეს სააკაშვილის ჯანმრთელობის მდგომარეობა და ვითარების შესაძლო განვითარებაზე იმსჯელეს.

„განვიხილეთ მიხეილ სააკაშვილის ჯანმრთელობის მდგომარეობა, ვისაუბრეთ შესაძლო სცენარებზე. მიხეილ სააკაშვილის საკითხი არ არის და არ იქნებ მხოლოდ „ნაციონალური მოძრაობის“ საზრუნავი საკითხი. იქნება ერთობა და ამ ერთობაში აუცილებლად მივიღებთ მონაწილეობას. ყველაფერს გავაკეთებთ, რომ [სააკაშვილი] გადავარჩინოთ და ქვეყნიდან გავიდეს. მზად ვართ, ერთობლივი მოქმედებისთვის. დღეს ყველაფერი დამოკიდებულია ბიძინა ივანიშვილის გადაწყვეტილებაზე. ხვალინდელი სასამართლო არის ტესტი - მოიყვანენ თუ არა. ვის უმალავენ და რატომ მალავენ. თუ გგონია, რომ პრობლემა არაა, რატომ არ აჩვენებ საზოგადოებას. ე.ი. დასამალია ხომ რაღაც?! მეორე საკითხია, რამდენად სწრაფად წავა პროცესი. აქ ბევრი დრო არ არის, ვერ გაჭიანურდება, სწრაფად უნდა დასრულდეს და გავიდეს ქვეყნიდან, ჩვენი მოქმედებები დამოკიდებული იქნება სცენარზე, თუ რას გადაწყვეტს საბოლოოდ ივანიშვილი. უკან დახევას, შეგუებას და დაქსაქსვას არ ვაპირებთ“,- განაცხადა ელენე ხოშტარიამ.