საქართველოს ტექნიკურ უნივერსიტეტში სან დიეგოს სახელმწიფო უნივერსიტეტი-საქართველოს კომუნიკაციების სპეციალისტმა ბრიანა ქვინტერომ, ABET აკრედიტაციის მაძიებელი პროგრამების: ელექტრული ინჟინერია, კომპიუტერული ინჟინერია, კომპიუტერული მეცნიერებები, ბიოსამედიცინო და სამოქალაქო ინჟინერია - სტუდენტებისთვის ლექცია წაიკითხა. ამის შესახებ ინფორმაციას სტუ ავრცელებს.

მათივე ცნობით, სან დიეგოს სახელმწიფო უნივერსიტეტი-საქართველოს კომუნიკაციების სპეციალისტმა ბრიანა ქვინტერომ ისაუბრა შესაძლებლობებზე, რომელიც თანამედროვე ციფრულმა ტექნოლოგიებმა მოიტანა სამყაროსთვის. ყურადღება გაამახვილა იმ უნარების გამომუშავებასა და წარმოჩენაზე, რაც სამუშაოს ძიების პროცესში სტუდენტს ესაჭიროება მზარდი კონკურენციის მქონე დასაქმების ბაზარზე. ასევე, განიხილა დასაქმების საიტების სპეციფიკა და მათზე ინფორმაციების სწორად განთავსების საკითხები.

როგორც საქართველოს ტექნიკური უნივერსიტეტის სასწავლო პროცესების მართვის დეპარტამენტის კარიერული განვითარების განყოფილების უფროსმა ნატო ქათამაძე აცხადებს, სტუ-სა და სან დიეგოს სახელმწიფო უნივერსიტეტს მრავალწლიანი ნაყოფიერი ურთიერთთანამშრომლობა აკავშირებს.

„საქართველოს ტექნიკურ უნივერსიტეტსა და სან დიეგოს სახელმწიფო უნივერსიტეტი- საქართველოს, შორის წლებია არსებობს მჭიდრო თანამშრომლობითი ურთიერთობა ერთობლივი ამერიკული საგანმანათლებლო პროგრამების შემუშავების მიმართულებით 5 პროგრამაზე. სწორედ ამიტომ, სან დიეგოს სახელმწიფო უნივერსიტეტის კომუნიკაციის სპეციალისტის ბრიანა ქვინტეროს ლექცია მნიშვნელოვანი იყო ABET აკრედიტაციის მაძიებელი სტუდენტებისთვის სან დიეგოს უნივერსიტეტში არსებული გამოცდილების გაზიარების კუთხით. რამეთუ შრომის ბაზარზე დღეს არსებული მზარდი კონკურენციის პირობებში სტუდენტებმა სწრაფად და მარტივად შეძლონ საერთაშორისოდ აღიარებულ დასაქმების საიტებზე ადაპტირება და მათთვის სასურველი ვაკანსიების აღმოჩენა და შემდგომ იმ უნარჩვევების გამოყენება რაც აუცილებელია დამსაქმებლებთან კომუნიკაციის დროს“, - განაცხადა ნატო ქათამაძემ.

ლექცია ინგლისურენოვანი იყო და სტუდენტთა ფართო ჩართულობით, კითხვა-პასუხის რეჟიმში წარიმართა.