ეს არის იმ პოლიტიკის გაგრძელება, როცა რუსეთი თავის განცხადებებით და ქმედებებით ცდილობს საქართველოში დათესოს შიდა არეულობა და დესტაბილიზაცია, - ასე ეხმიანება საგარეო ურთიერთობათა კომიტეტის თავმჯდომარე ნიკოლოზ სამხარაძე ინფორმაციას იმის თაობაზე, რომ რუსეთი საქართველოსთან ფრენების აღდგენას გეგმავს.

როგორც სამხარაძემ განაცხადა, უკეთესი იქნება, თუ მსგავს პროვოკაციებს არ წამოეგებიან.

„ამ განცხადებაზე უკვე პასუხი გასცა ზურაბ აბაშიძემ, რომელიც არის ჩვენი მთავრობის სპეციალური წარმომადგენელი რუსეთთან სავაჭრო და ჰუმანიტარული საკითხებში მოლაპარაკებებში და მან თქვა, რომ არავითარი მსგავსი კომუნიკაცია რუსეთთან არ ყოფილა და ეს საკითხი საქართველოს მხრიდან დღის წესრიგში არ დგას. რაც შეეხება იმას, თუ რატომ უნდა რუსეთს ამის წარმოჩენა, ეს არის იმ პოლიტიკის გაგრძელება, როცა რუსეთი თავის განცხადებებით და ქმედებებით ცდილობს საქართველოში დათესოს შიდა არეულობა, დესტაბილიზაცია, რათა უხეშად რომ ვთქვათ, ეს თემა აგორდეს, რომ შემდეგ ჩვენ, პოლიტიკოსებმა განცხადებები ვაკეთოთ. ასე რომ, უკეთესი იქნება თუ ამ პროვოკაციებს არ წამოვეგებით და დავუჯერებთ სახელმწიფოს წარმომადგენლებს, ამ შემთხვევაში, ზურაბ აბაშიძეს,"- განაცხადა სამხარაძემ.

რაც შეეხება რუსეთთან სავიზო პოლიტიკას და ამ საკითხზე გერმანიის კანცლერის, ოლაფ შოლცის განცხადებას, რომ ევროკავშირს და კანდიდატ ქვეყნებს ერთიანი მიდგომა უნდა ჰქონდეთ, სამხარაძე აღნიშნავს, რომ ევროპის ქვეყნებისგან განსხვავებით საქართველოს არ აქვს დიპლომატიური ურთიერთობა რუსეთთან და ამ საკითხის დარეგულირება პროცედურულად რთული შეიძლება იყოს.

„სავიზო პოლიტიკაზე (ერთიანი) მიდგომა უნდა ჰქონდეთ კანდიდატ ქვეყნებს, ეს განცხადება გაკეთებული იყო ბალკანეთში. ამ თემასთან დაკავშირებითაც გვაქვს კავშირი და კომუნიკაცია ევროკავშირთან, თუმცა, ძალიან დიდი განსხვავებაა საქართველოსა და რუსეთის ურთიერთობებთან და ევროპის ქვეყნებსა და რუსეთის ურთიერთობებს შორის. ეს განსხვავება გამოიხატება იმაში, რომ საქართველო არის ერთადერთი ქვეყანა, რომელსაც რუსეთთან დიპლომატიური ურთიერთობები არ აქვს, შესაბამისად, საქართველოს არ აქვს საელჩო რუსეთში, არ ჰყავს ელჩი და ალბათ, დიდი ხანი არ ეყოლება. აქედან გამომდინარე პროცედურულადაც ეს შეიძლება რთული საკითხი იყოს და ერთგვარი ვიზა, რომელიც მოქმედებს ეს არის საზღვარზე, მესაზღვრის მიერ დარტყმული შტამპი, ამ შემთხვევაში მესაზღვრეს აქვს უფლება თავის დისკრეციის მიხედვით შემოუშვას ან არ შემოუშვას ნებისმიერი ქვეყნის, მათ შორის, რუსეთის მოქალაქე“, - განაცხადა სამხარაძემ.

რუსეთის საგარეო საქმეთა სამინისტროს დსთ-ს ქვეყნების მეოთხე დეპარტამენტის დირექტორმა დენის გონჩარმა რუსულ გამოცემა TASS-თან ინტერვიუში განაცხადა, რომ რუსეთმა შესაძლოა, განაახლოს პირდაპირი ფრენები საქართველოსთან, მაგრამ ამისთვის უნდა შეიქმნას „აუცილებელი წინაპირობები“. „რაც შეეხება საქართველოს მოქალაქეებისთვის პირდაპირი ავიამიმოსვლის აღდგენისა და ვიზალიბერალიზაციის პერსპექტივებს, თუ ამისათვის აუცილებელი წინაპირობები შეიქმნა - პირობები თბილისში კარგად არის ცნობილი - ჩვენ არ გამოვრიცხავთ ამ საკითხზე გადაწყვეტილებების მიღებას", - განაცხადა გონჩარმა.