პარლამენტი „ადგილობრივი თვითმმართველობის კოდექსში“ დაგეგმილი ცვლილებების პროექტის განხილვას იწყებს, რომლის საფუძველზეც, თუკი საკრებულო მუნიციპალიტეტის ბიუჯეტს ვერ დაამტკიცებს, მერს უფლებამოსილება აღარ შეუწყდება.

პროექტის თანახმად, იმ შემთხვევაში, თუ საკრებულო მერის მიერ შეთავაზებულ ბიუჯეტს არ გაიზიარებს და მხარს არ დაუჭერს, უფლებამოსილება მხოლოდ საკრებულოს შეუწყდება.

საკითხს დღეს პარლამენტის ადგილობრივი თვითმმართველობისა და რეგიონების კომიტეტი განიხილავს და სავარაუდოდ, დღესვე, პირველი მოსმენით, სესიაზე გავა. პროექტი „ქართული ოცნების“ დეპუტატების მიერ არის ინიცირებული.

ოპოზიციის შეფასებით, აღნიშნული საკანონმდებლო ცვლილებებით მმართველი გუნდი ოპოზიციურ საკრებულოებს კონტროლის მნიშვნელოვან ბერკეტს ართმევს, ამ გზით ოპოზიციურ საკრებულოებს მმართველი გუნდის დავალებების შესრულება მოუწევს, წინააღმდეგ შემთხვევაში კი - დაიშლება.