კი ბატონო, შეიძლება ერთმანეთს პირადად რაღაც ზედმეტი ვუთხრათ, ვაკადროთ, ეს პოლიტიკაში „მოსულა“, მაგრამ ოჯახის და ბავშვების სახელის ხსენება არის ამაზრზენი, მიუღებელი და ეს ყველამ უნდა იცოდეს, - ამის შესახებ „ქართული ოცნების“ დეპუტატმა, ირაკლი ზარქუამ პარლამენტის პლენარულ სხდომაზე განაცხადა.
მისივე თქმით, ოჯახისა და შვილების ხსენება არის წითელი ხაზი, რომელიც არც ერთმა პოლიტიკოსმა არ უნდა გადაკვეთოს.
„ყველას ეძლევა შესაძლებლობა, რომ თავიანთი პროტესტი დააფიქსიროს, მაგრამ როცა ოჯახის და ბავშვებს ხსენება მიუღებელი და დასაგმობია. ეს არის ის წითელი ხაზი, რაც არავინ არ უნდა გადავლახოთ. ეს მიუღებელია, ეს სამარცხვინოა და იმედი მაქვს, რომ ამას გაითვალისწინებენ, მათ შორის, იმ რადიკალურ ოპოზიციაშიც. კი ბატონო, შეიძლება, პირადად ერთმანეთს რაღაც ზედმეტი ვუთხრათ, ვაკადროთ, ეს „მოსულა“ პოლიტიკაში, მაგრამ ოჯახის და ბავშვების სახელის ხსენება არის ამაზრზენი, მიუღებელი და ეს უნდა იცოდეს ყველამ”, - განაცხადა ზარქუამ.
ცნობისთვის, პლენარულ სხდომათა დარბაზის დატოვებამდე „ნაციონალური მოძრაობის“ ფრაქციის დეპუტატმა, ანა წითლიძემ იუსტიციის მინისტრს, რატი ბრეგაძეს მიმართა და აღნიშნა, რომ „მის ქმედებებზე პასუხისგება მის შვილებს მოუწევთ".