გიორგი ვაშაძის, ელენე ხოშტარიას და ზურა ჯაფარიძის შეხვედრა 24 თებერვლის სოლიდარობის აქციის ინიციატორებთან ერთად უკრაინის საელჩოში დაიწყო.

როგორც გიორგი ვაშაძემ შეხვედრის დაწყებამდე განმარტა, ისინი ანდრეი კასიანოვთან ერთად განიხილავენ იმას, თუ რა ფორმით აპირებენ 24 თებერვლის აქციის გამართვას.

ვაშაძის თქმით, ის უკრაინაში მიმდინარე ომისას ტყვედ ჩავარდნილი საქართველოს მოქალაქეების საკითხსაც დააყენებს.

„24 თებერვლის საინიციატივო ჯგუფის სახელით ვხვდებით. გავაცნობთ რას ვაპირებთ უკრაინის სოლიდარობის აქციაზე 24 თებერვალს და მოვისმენთ მის აზრებს. ამაზე გვექნება ძირითადად საუბარი. თუმცა ასევე არის სხვა საკითხები - ჩვენი ქვეყნის მოქალაქეები არიან ტყვედ ჩავარდნილები და მე ამ საკითხსაც დავსვამ ამ შეხვედრაზე. ჩემი კონტაქტებით ვმუშაობთ უკრაინაში რომ გამოვიხსნათ ტყვეობიდან და აქაც შევეცდები, რომ კიდევ ერთხელ დავსვა ეს საკითხი“,- განაცხადა ვაშაძემ.