ყველაფერს გავაკეთებ, რომ საუკეთესო 32 სპორტსმენში შევიდე, - ამის შესახებ ქართველმა სნოუბორდერმა, რევაზ ნაზღაიძემ ჟურნალისტებთან საუბრისას განაცხადა, რომელიც პარალელური გიგანტური სლალომის დისციპლინაში მონაწილეობს.

მისივე თქმით, მსოფლიო ჩემპიონატის მასპინძლობა არამარტო ბაკურიანის, არამედ საქართველოს წარმატებაა.

„კარგად ვარ მომზადებული, მსოფლიო და ევროპის თასებზე ვიასპარეზე, ჩემი შედეგით კმაყოფილი ვარ. ყველაფერს გავაკეთებ, რომ საუკეთესო 32 სპორტსმენში შევიდე. რაც შეეხება კონკურენტებს, რა თქმა უნდა, ყველაზე ძლიერი სპორტსმენები ჩამოდიან და უნდა შეეცადო, რომ მაქსიმალური გააკეთო. უმნიშვნელოვანესი მოვლენაა, რომ აქ ვიმყოფებით და მსოფლიო ჩემპიონატს ვმასპინძლობთ. ეს არის არა მარტო ბაკურიანის, არამედ, საქართველოს წარმატება. ვულოცავ საქართველოს!"- აღნიშნა ნაზღაიძემ.

შეგახსენებთ, რომ 5 მარტამდე, ბაკურიანი ფრისტაილის სნოუბორდისა და ფრისკის მსოფლიო ჩემპიონატს მასპინძლობს. მთავარი ლოკაციები დიდველისა და კოხტას მთებია, სწორედ აქ შეიკრიბება ასობით ათლეტი 42 ქვეყნიდან, 7 სახეობაში საასპარეზოდ. მათ შორის იასპარეზებენ ქართველი ათლეტები სქი ქროსის და ფრისტაილის კატეგორიაში.

მსოფლიო ჩემპიონატი საქართველოს მთავრობის მხარდაჭერით, მთის ტრასების სააგენტოსა და სათხილამურო ფედერაციის ორგანიზებით ტარდება.