მთავრობა არის სასწრაფოდ შესაცვლელი, სასწრაფოდ!- ამის შესახებ “ინტერპრესნიუსს” ოპერის მომღერალმა პაატა ბურჭულაძემ პარლამენტთან განუცხადა, სადაც უკრაინისადმი მხარდამჭერი აქცია მომდინარეობს.

მისი თქმით, საქართველოს მავნებელი მთავრობა ჰყავს.

“ჩვენი დღევანდელი აქცია ნათლად გვაჩვენებს, სად არის ქართველი ხალხი და სად არის საქართველოს მთავრობა. ეს მავნებლური მთავრობა. ამას უნდა გავუსვათ ხაზი, რომ ისინი არიან მავნებლები. 10 წლის განმავლობაში მხოლოდ ავნეს ჩვენ ქვეყანას. ამიტომაც, დღეს, კიდევ ერთხელ გამოჩნდა, ქართველებმა მკაფიოდ დავინახეთ, რომ 30 წელი რაც კი, გვიკეთებია, სისხლი დაგვიღვრია თუნდაც ამ ადგილზე, სადაც ახლა ვდგავართ, ცხრა აპრილიც გავიხსენოთ - შეიძლება ამან ფუჭად ჩაიაროს ამ მთავრობის ხელში. მთავრობა არის სასწრაფოდ შესაცვლელი, სასწრაფოდ! იქ, უკრაინელები, ჩვენი გმირები სისხლს ღვრიან ჩვენთვის. აქ[მთავრობის წარმომადგენლები] ჩვენ გვასწავლიან და გვეუბნებიან ერთ რამეს, რომ უკრაინა აგებს ომს და რაღაც სოფლებს იღებს რუსეთის ჯარი. ეს სამარცხვინოა. ჩვენ ვხვდებით, რატომაც ხდება ეს და კარგია, რომ მსოფლიოს ვანახებთ ერთ რამეს, რომ ქართველი ხალხი და ქართველი მთავრობა არის აბსოლუტურად სხვადასხვა რამე. პირდაპირ ვთქვათ, ეს მთავრობა ჩვენ არ აგვირჩევია, არც პრეზიდენტია ჩვენი არჩეული, პრეზიდენტი არის დანიშნული. ესენი არიან დანიშნულები. სანამ საქართველოს არ ეყოლება ისეთი მთავრობა, ვისაც ხალხი აირჩევს მანამდე ჩვენ ვიქნებით ასეთ დღეში”,- განაცხადა ბურჭულაძემ.