პარლამენტის პრესსამსახურის ინფორმაციით, ბრიუსელში ვიზიტის ფარგლებში, პარლამენტის თავდაცვისა და უშიშროების კომიტეტის თავმჯდომარემ, ირაკლი ბერაიამ ჩრდილო-ატლანტიკური ალიანსის გენერალური მდივნის თანაშემწესთან ოპერაციების საკითხებში, ტომ გოფუსთან შეხვედრა გამართა.

როგორც ინფორმაციაშია აღნიშნული, შეხვედრაზე განიხილეს საქართველოს უსაფრთხოების გამოწვევები, ომი უკრაინაში და მისი გავლენა რეგიონის და ევრო-ატლანტიკური სივრცის უსაფრთხოებაზე, საქართველოს პროგრესი ევრო-ატლანტიკური ინტეგრაციის პროცესში და ალიანსის მხრიდან პოლიტიკური და პრაქტიკული მხარდაჭერის შემდგომი გაძლიერების მნიშვნელობა და საჭიროება.

„შეხვედრაში პარლამენტის საგარეო ურთიერთობათა კომიტეტის თავმჯდომარის პირველი მოადგილე, გიორგი ხელაშვილი, თავდაცვისა და უშიშროების კომიტეტის თავმჯდომარის მოადგილე, ვლადიმერ ჩაჩიბაია, საქართველოს ელჩი ნატო-ში, ვიქტორ დოლიძე და საქართველოში ნატო-ს სამეკავშირეო ოფისის ხელმძღვანელი, ალექსანდრ ვინნიკოვი მონაწილეობდნენ”, - ნათქვამია ინფორმაციაში.