„კრედიტ სუისს"-ის რეპუტაცია დღეს უკიდურესად დაზიანებულია და როგორც ჩანს, გარკვეული ჯგუფი, ვინც დღეს მას აკონტროლებს, უფრო მეტად ბატონ ივანიშვილზე ზეწოლითაა დაინტერესებული, ვიდრე ბანკის რეპუტაციით, - ამის შესახებ პარლამენტის თავმჯდომარის მოადგილე არჩილ თალაკვაძემ განაცხადა.

მისი თქმით, ევროპის შუაგულში ადამიანის ერთ-ერთ მთავარ უფლებას - საკუთრების უფლებას ხელყოფენ.

„რაც შეეხება "კრედიტ სუისს", შემაშფოთებელი და საგანგაშოა, როდესაც ევროპის შუაგულში ერთ-ერთ მთავარ და კონვენციურ უფლებას, საკუთრების უფლებას ასე უხეშად ხელყოფენ და ამაზე, ჯერჯერობით, ნულოვანი რეაგირება აქვთ იმ სტრუქტურებს, რომლებიც ვალდებულები არიან, მსგავს დროს რეაგირება მოახდინონ. მიუხედავად იმისა, რომ ბიძინა ივანიშვილმა სასამართლო დავები მოიგო, ვხედავთ, რომ ის დეფაქტო სანქციის ქვეშ არის და მას არ აქვს საშუალება, თავისი საკუთრება განკარგოს. ეს ყველაფერი ხდება შვეიცარიაში, ევროპის შუაგულში და წარსულში ერთ-ერთ ყველაზე სანდო საბანკო ინსტიტუტს უკავშირდება. „კრედიტ სუისს“-ის რეპუტაცია დღეს უკიდურესად დაზიანებულია და როგორც ჩანს, გარკვეული ჯგუფი, ვინც დღეს მას აკონტროლებს, უფრო მეტად ბატონ ივანიშვილზე ზეწოლითაა დაინტერესებული, ვიდრე ბანკის რეპუტაციით“, - განაცხადა არჩილ თალაკვაძემ.