პერსონალურ მონაცემთა დაცვის სამსახურის უფროსის, ლელა ჯანაშვილის ინფორმაციით, შემაჯამებელი გადაწყვეტილების მიღების სტადიაზეა მიხეილ სააკაშვილის სამედიცინო დაწესებულებაში ყოფნის ვიდეო ჩანაწერების გასაჯაროების კანონიერების შესწავლა.

მისივე ინფორმაციით, საქმე ეხება საქართველოს მესამე პრეზიდენტის, მიხეილ სააკაშვილის იმ კადრებს, რომელიც 14 დეკემბერსა და 15 თებერვალს სპეციალური პენიტენციური სამსახურის მიერ გასაჯაროვდა.

"მოგეხსენებათ, პატიმრობაში მყოფი მიხეილ სააკაშვილის სამედიცინო დაწესებულებაში ყოფნის ვიდეო ჩანაწერები 2-ჯერ გასაჯაროვდა სპეციალური პენიტენციური სამსახურის მიერ, დეკემბერსა და თებერვალში. ჩვენივე ინიციატივით ორივე შემთხვევაზე დაიწყო შესწავლა, პენიტენციური სამსახურის შემოწმება. შემოწმების დასრულების ვადად განისაზღვრა 14 მარტის ჩათვლით პერიოდი. საქმეზე თითქმის, ყველა კანონით გათვალისწინებული მნიშვნელოვანი მოქმედებაა ჩატარებული, ამჟამად ვიმყოფებით შემაჯამებელი გადაწყვეტილების მიღების სტადიაზე",- აღნიშნავს ლელა ჯანაშვილი.