არსებობს კითხვები, რომელიც ახალი არ არის და საჯარო დისკუსიის საგანია - მათ შორისაა კითხვა, რატომ დაუჭირეს თავის დროზე მხარი ევროსაბჭოს მძიმე შინაარსის რეზოლუციას, - ასე უპასუხა პარლამენტის თავმჯდომარე შალვა პაპუაშვილმა “ევროპელი სოციალისტების“ ინიციატივასთან დაკავშირებით დასმულ კითხვას, რომელიც 2008 წლის რუსეთ-საქართველოს ომის საკითხზე საგამოძიებო კომისიის შექმნას ითვალისწინებს.
ამასთან, როგორც პაპუაშვილმა აღნიშნა, როდესაც ინიციატორი ჩამოაყალიბებს მოსაზრებას ინიციატივის მიზნებსა და შინაარსზე, პასუხი ამის მიხედვით ექნება.
“ვერ გეტყვით - ამ თემას ბოლომდე თვალყურს არ ვადევნებ. ზოგადად შემიძლია ვთქვა, რომ არის ბევრი კითხვა, რომელიც საჯაროდ ისმის. საბოლოო ჯამში, კითხვები ახალი არ არის, თუნდაც რეზოლუციასთან დაკავშირებით. არ ვიცი, ინიციატივის ზუსტი შინაარსი, რა კუთხით არის და ასე შემდეგ - ჩვენც ამის მიხედვით ვიმსჯელებთ და პოზიციას ჩამოვაყალიბებთ“, - განაცხადა შალვა პაპუაშვილმა.
“ევროპელი სოციალისტები“ 2008 წლის აგვისტოს ომთან დაკავშირებით გამოძიების დაწყებას ითხოვენ. პარტია 2008 წლის ომის თემაზე საპროკურორო გამოძიების დაწყების, ასევე, ამავე თემაზე საპარლამენტო საგამოძიებო კომისიის შექმნის მიზნით ხელმოწერების შეგროვებას იწყებს.
როგორც “ევროპელი სოციალისტების“ დეპუტატმა ფრიდონ ინჯიამ პარლამენტში გამართულ პრესკონფერენციაზე განაცხადა, 2008 წლის ომის საფუძვლიანი გამოძიება ახალი ომის პრევენციაში მნიშვნელოვან წვლილს შეიტანს. მისივე თქმით, საკითხი მით უფრო აქტუალურია დღეს იმ ფონზე, როცა ხელისუფლების წარმომადგენლები საქართველოში მეორე ფრონტის გახსნის საფრთხეებზე ღიად საუბრობენ.