მე პირადად, ლევან იოსელიანს, როგორც ომბუდსმენს, ვერ განიხილავ და ძალიან მიკვირს ჩემი ოპოზიციონერი კოლეგების დამოკიდებულება, როდესაც მისი კანდიდატურით აღფრთოვანდნენ, - ამის შესახებ „სტრატეგია აღმაშენებლის“ ერთ-ერთმა ლიდერმა, სერგო ჩიხლაძემ ჟურნალისტებთან საუბრისას განაცხადა.

მისივე თქმით, აუცილებელია, რომ ომბუდსმენის პოსტზე კანდიდატურა არასამთავრობო სექტორიდან იყოს წარმოდგენილი.

„ადამიანი ვიცე-სპიკერია, კონკრეტულ პარტიას წარმოადგენს და უცებ პარტიული აღარ არის, ეს ცოტა გაურკვეველია. გუშინ მისი პოზიციები მოვისმინე. ის არ თვლის, რომ მიხეილ სააკაშვილის ჯანმრთელობის საკითხი არის სასწრაფო საქმე. ის არ თვლის, რომ საჭიროა მისი სასწრაფოდ გადაყვანა. მას გაუჭირდა პასუხის გაცემა, არის თუ არა ნიკა გვარამია პოლიტპატიმარი. ძალიან ბევრი იწვალა ამ თემაზე. მას არ გაუპროტესტებია მედიის შემზღუდველი კანონი პარლამენტში, პირიქით, ეს კანონი მოიწონა, ამიტომ მე პირადად, ამ ადამიანს პიროვნულად არ ვერჩი, როგორც ომბუდსმენს, მას ვერ განვიხილავ და ძალიან მიკვირს ჩემი ოპოზიციონერი კოლეგების დამოკიდებულება, როდესაც აღფრთოვანდნენ მისი კანდიდატურით“,- განაცხადა სერგო ჩიხლაძემ.