ოპოზიციონერი დეპუტატის, ნატო ჩხეიძის განცხადებით, ოპოზიციონერი მამაკაცი დეპუტატები, რომლებიც სხდომათა დარბაზიდან ძალის გამოყენებით გაიყვანეს, პარლამენტის შენობიდანაც გაიყვანეს და პირადობის მოწმობები ჩამოართვეს. ამის შესახებ ნატო ჩხეიძემ საგარეო ურთიერთობათა და თავდაცვისა და უშიშროების კომიტეტების ერთობლივ სხდომაზე განაცხადა, სადაც ე.წ. აგენტების შესახებ კანონპროექტები ხმაურის ფონზე განიხილება.

„ამ დარბაზში იხილება კანონი და ფაქტობრიოვად დარბაზში ვართ ქალი დეპუტატები, ხოლო ოპოზიციონერი მამაკაცი დეპუტატები გაყვანილები არიან პარლამენტის შენობიდან. მაქვს ინფორმაცია, რომ მათ ჩამორთმეული აქვთ მანდატი, ჩამორთმეული აქვთ პირადობის მოწმობა და შესაბამისად, ვერ შემოდიან შენობაში. ერთი ის, რომ, ალბათ, ეს არის გენდერული დისკრიმინაცია და ამასაც უნდა მიხედვა. ქალბატონო ნინო (წილოსანი), კარგია, რომ სათაური არ მოგწონთ და ახლა ყველამ გავიხედოთ ჭერისკენ, გრძლივი და განივი ბზარები არის თუ არა“,- განაცხადა ნატო ჩხეიძემ.