საზოგადოებისთვის ძალიან მნიშვნელოვანია იხილონ კონსოლიდირებული ოპოზიციური ჯგუფები, პოლიტიკოსები, არასამთავრობო ორგანიზაციების წარმომადგენლები, აქტიური მოქალაქეები, სხვადასხვა სფეროს და დარგის წარმომადგენლები, ვისაც მნიშვნელოვნად მიაჩნია სახელმწიფოსთვის ისტორიული არჩევანის შენარჩუნება, - ამის შესახებ "ერთიანი ნაციონალური მოძრაობის" ყოფილმა თავმჯდომარემ ნიკა მელიამ ე.წ. უცხოური გავლენის აგენტების შესახებ კანონპროექტთან დაკავშირებით, ოპოზიციონერი პოლიტიკოსებისა და არასამთავრობო სექტორის წარმომადგენლების შეხვედრის შემდეგ განაცხადა.

მელიას თქმით, ე.წ. უცხოური გავლენის აგენტების კანონპროექტი კანონად არ უნდა იქცეს.

„საზოგადოებისთვის ძალიან მნიშვნელოვანია იხილონ კონსოლიდირებული ოპოზიციური ჯგუფები, პოლიტიკოსები, არასამთავრობო ორგანიზაციების წარმომადგენლები, აქტიური მოქალაქეები, სხვადასხვა სფეროს და დარგის წარმომადგენლები, ვისაც მნიშვნელოვნად მიაჩნია სახელმწიფოსთვის ისტორიული არჩევანის შენარჩუნება, რომელიც უკავშირდება ევროპულ მომავალს. უკავშირდება არამარტო ევროპულ პერსპექტივას, უფრო მძიმე გამოწვევის წინაშე დააყენა “ქართულმა ოცნებამ” საზოგადოება - წაართვას საქართველოს მოქალაქეებს საკუთარი იდენტობა.

ვფიქრობ, რომ დღითიდღე სულ უფრო მეტი ადამიანი იქნება ეროვნულ და ევროპული იდეის გარშემო გაერთიანებული და ეს ბოლშევიკური კანონპროექტი კანონად არ უნდა იქცეს, იმ კანონად, რომელიც გააკონტროლებს ყველას და ყველაფერს“,- განაცხადა ნიკა მელიამ.