წარსულისა და მომავლის გააზრებით საქართველო ერთგული იქნება ევროპული გეზის,-ამის შესახებ საქართველოს ელჩი საფრანგეთში, გოჩა ჯავახიშვილი „ფეისბუქის“ პირად გვერდზე წერს, რითაც ე.წ. აგენტების შესახებ კანონპროექტს და ამ თემასთან დაკავშირებით საზოგადოებრივ მღელვარებას ეხმაურება.

როგორც დიპლომატი აღნიშნავს, სწორედ ამ გეზს ემსახურება საკუთარი საქმით, რადგან ეს არის მისი მწამსი და მოქალაქეობრივი პოზიცია.

“ევროპა არ არის მხოლოდ საზღვრებით გარშემორტყმული გეოგრაფიული სივრცე. ევროპა უპირველესად ღირებულებათა ერთობლიობაა. ევროპელობა ამ ღირებულებათა ერთგულებაა. საქართველო, რომელსაც მე ვემსახურები არ გახლავთ არც მხოლოდ მთავრობა და არც მხოლოდ ოპოზიცია, არც ერთი და არც მეორე არ აერთიანებს საკუთარ თავში ქვეყნის წარსულს, აწმყოსა და მომავალს.

მხოლოდ ხალხი, მისი ისტორია, კულტურა განსაზღვრავს ქვეყნის ისეთ ფუნდამენტალურ მისიას, როგორიცაა მისი სულიერი და კულტურული და იდენტობა. ჩვენ წინაპართა ნება და ანდერძია ჩვენი სამშობლოს ევროპული მომავალი.

წარსულისა და მომავლის გააზრებით საქართველო ერთგული იქნება ევროპული გეზის. მე ამ გეზს ვემსახურები ჩემი მოკრძალებული საქმით. ეს არის ჩემი მრწამსიცა და მოქალაქის პოზიციაც. ეს მისია მაქვს განსაზღვრული და ვემსახურები საქართველოს ევროპულ საქმეს. სხვა არც გეზი მესმის და არც საქმე “,- წერს გოჩა ჯავახიშვილი „ფეისბუქზე“.