თავიდანვე ვთქვით, რომ ეს დოკუმენტი გაიგზავნებოდა ვენეციის კომისიაში. ამაზე მეტი პატივისცემა, ბუნებრივია, არ შეიძლება გამოხატო ევროპული სტრუქტურების მიმართ, - ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისივე თქმით, საუბარი იმაზე, რომ ე.წ. აგენტების შესახებ კანონპროექტი რუსულია და რომ ის ევროკავშირის კანდიდატის სტატუსს გვაშორებს, ტყუილია.

კობახიძის განცხადებით, საბოლო ჯამში რა სახეს მიიღებს კანონი, ვენეციის კომისიის დასკვნაზე იქნება დამოკიდებული.

„ჩვენ მსჯელობა გვექნება ყველაფერთან დაკავშირებით, მათ შორის, იმასთან დაკავშირებით თუ როგორ შეიძლება გამოირიცხოს 100%-ით იგივე სოციალური საკითხებით დაკავებული ორგანიზაციები ასეთი რეესტრიდან. ეს შეიძლება გამოირიცხოს. მეორე მოსმენა არის იმისთვის, რომ ყველა დეტალი იყოს გავლილი. პირველი მოსმენის დროსაც გარკვეული დაზუსტებები უკვე შევიდა ამ კანონში, მაგალითად, ყველა საგანმანათლებლო დაწესებულება პირდაპირ გამოირიცხა ამ წრიდან. მსჯელობა გაგრძელდება. საბოლო ჯამში რა სახეს მიიღებს კანონი, დამოკიდებული იქნება ვენეციის კომისიის დასკვნაზე და პარლამენტში მეორე მოსმენით განხილვის პროცედურაზე.

იყო სიცრუეზე აგებული კამპანია, რომ თითქოს ეს იყო რუსული კანონი, რაც არის ტყუილი. საუბარი იყო იმაზე, რომ თითქოს ეს დოკუმენტი გვაშორებს კანდიდატის სტატუსს, რაც ასევე არის ტყუილი. ჩვენ ბოლომდე ვცემთ პატივს ევროპულ სტრუქტურებს და თავიდანვე ვთქვით, რომ ეს დოკუმენტი გაიგზავნებოდა ვენეციის კომისიაში. ამაზე მეტი პატივისცემა არ შეიძლება, ბუნებრივია, გამოხატო ევროპული სტრუქტურების მიმართ,“ - განაცხადა კობახიძემ.