საპროტესტო აქციის მონაწილეების წინააღმდეგ არ უნდა იყოს გამოყენებული გადაჭარბებული ძალა. ხელისუფლებამ უნდა შეაჩეროს მომიტინგეების დარბევა. სამართალდამცავი სტრუქტურები პასუხისმგებლები არიან თითოეული მომიტინგის ჯანმრთელობასა და სიცოცხლეზე, - ამის შესახებ პარტია „ევროპელი დემოკრატების“ თავმჯდომარემ პაატა დავითაიამ განაცხადა.

ხელისუფლება უნდა გადავიდეს კონსტრუქციულ რეჟიმში და დაიწყოს დიალოგი მომიტინგეებთან, რადგან ყოველი ქმედება, რომელიც ხორციელდება ხელისუფლების მხრიდან რუსთაველის გამზირზე, აზიანებს ჩვენი ქვეყნის იმიჯს, ჩვენს სწრაფვას დასავლეთისკენ და იმ ღირებულებებს, რაც გაწერილია საქართველოს კონსტიტუციით.

ხელისუფლებამ ყველაფერი უნდა გააკეთოს იმისთვის, რომ შეაჩეროს პროცესების ესკალაცია, შეასრულოს საზოგადოების, ჩვენი ახალგაზრდების, აგრეთვე ევროკავშირის ყველა განშტოების, ამერიკის შეერთებული შტატების სახელმწიფო დეპარტამენტის და ყველა ჩვენი პარტნიორის მოთხოვნა - გაიწვიოს პირველი მოსმენით მიღებული კანონი „უცხოური გავლენის გამჭირვალობის შესახებ“ . დაძაბულობა, რომელიც ამ კანონის მიღების შემდეგ შეიქმნა ჩვენს ქვეყანაში, მხოლოდ და მხოლოდ რუსეთის წისქვილზე ასხამს წყალს“, - აცხადებს პაატა დავითაია, რმელსაც პრესსამსახური ავრცელებს.