„ლელოს“ დეპუტატის ანა ნაცვლიშვილის განცხადებით, დღეს პარლამენტის პლენარულ სხდომაზე უნდა გაფორმდეს ქართველი ხალხის ნება - „არა, რუსულ კანონს!“

როგორც მან ჟურნალისტებს პარლამენტში შესვლამდე განუცხადა, აქციაზე მყოფი ადამიანები დარჩებიან მუდმივ სიფხიზლეში და დეპუტატები კი მათი ნების აღმსრულებლები იქნებიან პარლამენტში და პარლამენტის გარეთაც.

„დღეს პარლამენტის სხდომაზე უნდა გაფორმდეს ქართველი ხალხის ნება - „არა, რუსულ კანონს!“, ამიტომ მოვედი მე პირადად აქ, რომ ბოლომდე სამართლებრივად, კონსტიტუციურად გაფორმდეს ხალხის მოთხოვნა და გაიწვიონ უკან რუსული კანონი. გეგმა არის ის, რომ სანამ საქართველო არ იქნება ევროკავშირის ნაწილი და არ გავა სამშვიდობოს, ეს ადამიანები დარჩებიან მუდმივ სიფხიზლეში და ჩვენ, დეპუტატები, მათი ნების აღმსრულებლები ვიქნებით პარლამენტში და პარლამენტს გარეთაც. დღეს საზოგადოება აქ იმისთვისაა, რომ საკუთარი თვალით ნახოს და საკუთარი ყურით მოისმინოს როგორ აღსრულდება ხალხის გადაწყვეტილება - „არა, რუსულ კანონს!“. აქციები არის ხალხის გადაწყვეტილება. ამიტომ ხალხი გადაწყვეტს, როდის, რაზე გააკეთებს აქციას. ამას არ ვწყვეტთ პოლიტიკოსები, ამას წყვეტს ქართველი ხალხი, ჩვენ ვასრულებთ მათ გადაწყვეტილებას“, - განაცხადა ანა ნაცვლიშვილმა.