ღარიბაშვილისა და კობახიძის ხელში ძალაუფლება იგივეა, რაც მაიმუნები "ლიმონკით“, - ამის შესახებ „სტრატეგია აღმაშენებლის“ დეპუტატმა, პაატა მანჯგალაძემ განაცხადა, რითაც საქართველოს პრემიერ-მინისტრის, ირაკლი ღარიბაშვილის განცხადებები შეაფასა.

მისივე თქმით, ღარიბაშვილის მხრიდან აქციის მონაწილე ახალგაზრდების ანარქისტებად და სატანისტებად გამოცხადება მის ძალიან მძიმე მდგომარეობაზე მიუთითებს არა მხოლოდ პოლიტიკურად, არამედ ემოციურად და ფსიქოლოგიურადაც.

მანჯგალაძის განცხადებით, ღარიბაშვილის ხელში ძალაუფლების არსებობა, ნებისმიერი ფორმით, სახიფათოა უპირველესად საქართველოსა და მისი მოქალაქეებისთვის.

„ამიტომ აუცილებელია რაც შეიძლება სწრაფად მისი და "ქართული ოცნების" გუნდის ხელისუფლებისგან ჩამოშორება. როგორ შეიძლება შენი შვილის თაობის ათობით ათას ახალგაზრდას, რომელიც აქციაზე გამოვიდა და ითხოვდა თავისუფლებასა და ევროპას, უწოდო სატანისტები და ანარქისტები? ეს იმდენად მძიმე მდგომარეობაა, რომ ღარიბაშვილისა და კობახიძის ხელში ძალაუფლება იგივეა, რაც მაიმუნები "ლიმონკით", - განაცხადა მანჯგალაძემ.