„ქართულმა ოცნებამ“ ე.წ. აგენტების შესახებ კანონპროექტის ინიცირებით, რეპუტაციული ზიანი მიიღო,- ამის შესახებ „რონდელის ფონდის“ ევროპული კვლევების ცენტრის დირექტორმა, კახა გოგოლაშვილმა განაცხადა.

მან „პალიტრანიუსის“ გადაცემაში „რეზიუმე“ ისაუბრა ქვეყანაში არსებულ პოლიტიკურ ვითარებაზე და განაცხადა, რომ მთავრობა სიტუაციის განმუხტვის ნაცვლად, „ცეცხლს უნთებს“ .

„ჩვენი მთავრობა დაინტერესებული უნდა იყოს, რომ სიტუაცია დაარბილოს და შემდეგ განმუხტვაზე იმუშაოს, ამის ნაცვლად, პირიქით ცეცხლს უნთებს და ცდილობს კონფლიქტი გააღვივოს. შეუძლებელს ხდის ევროპულ ინსტიტუტებთან დიალოგს. არ შეიძლება ამის დიდ ხანს გაგრძელება, ბოლოს უკვე იზოლირება ხდება.

ევროკავშირი, ევროკავშირის საბჭო, ევროკომისია ვის ელაპარაკება? - მთავრობას ელაპარაკება. ქვეყანას, რომელსაც უნდა გახდეს ევროკავშირის წევრი, შეუძლებელია ასე მიაღწიოს რამეს.

მთავრობას რეალურად არ უნდა ევროკავშირში, ხოლო ხალხს უნდა. ვხედავთ, რომ ყველაფერს რასაც „ქართულ ოცნება“ და მისი ხელმძღვანელობა აკეთებს, ევროკავშირში გაწევრიანებისგან გვაშორებს.

„ქართულმა ოცნებამ“ ე.წ. აგენტების შესახებ კანონპროექტის ინიცირებით რეპუტაციული ზიანი მიიღო. რადგან ხელისუფლებას რეპუტაციული ზიანი მიადგა, ამიტომ მოსახლეობის წინაშე თავის გამართლებას შეეცდებიან იმისათვის, რომ ლეგიტიმაცია და მხარდაჭერა არ შეუმცირდეთ. ამას თან სდევს ილუზია იმისა, რომ მაინც მიიღებენ. ახლა თუ არა 2-3 თვის შემდეგ, როცა დაწყნარდება ვითარება“,- განაცხადა გოგოლაშვილმა.

მისივე განმარტებით, დასავლეთთან და საკუთარ ხალხთან დაპირისპირება, წაგებული თამაშია.

„შენ მოითხოვე ევროკავშირში შესვლა და არის კონკრეტული პროგრამა, რომელიც უნდა შეასრულო, იმისთვის, რომ ევროკავშირის წევრი გახდე. საუბარი, რომ ჩვენ არ გვინდა დავკარგოთ სუვერენიტეტი, ეს არის სპეკულაციური საუბრები. ეს არის გაუთვითცნობიერებელ მსმენელზე გათვლილი. დასავლეთთან და საკუთარ ხალხთან დაპირისპირება, წაგებული თამაშია“, - განაცხადა გოგოლაშვილმა.

ამასთან, მისი თქმით, დღევანდელი მონაცემებით, საქართველო ევროკავშირის კანდიდატის სტატუს ვერ მიიღებს.

„იმ საუბრებიდან, რაც მოვისმინეთ, ევროკავშირმა პირდაპირ გვითხრა, რომ კანდიდატის სტატუსს არ გვაძლევს“, - განაცხადა გოგოლაშვილმა.