განსხვავებული აზრის დევნა ის ფაშისტური კამპანიაა, რომელსაც ყოფილი სახალხო დამცველი, თუ სხვა ასეთი პირები აწარმოებენ, - ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, აკადემიურ სივრცეში პოლიტიკას არაფერი ესაქმება და ეს ყველა უნივერსიტეტის შიდა სტანდარტია.

„ხომ არ ხდება აკადემიურ სივრცის პოლიტიკურად გამოყენება? - ჩვენ ამას ვხედავთ, თუნდაც ის, რომ იქ ორგანიზებულად არიან ესა თუ ის ჯგუფები, სტუდენტების თუ ა.შ. რომელიც ამ საკითხით დაკავებულები არიან, მათ შორის, ჩვენ პოლიტიკურად აქტიური ლექტორებიც ვნახეთ. აკადემიურ სივრცეში პოლიტიკას არაფერი ესაქმება და ეს ყველა უნივერსიტეტის შიდა სტანდარტი გახლავთ. უნივერსიტეტმა თავად უნდა ისაუბრონ ამაზე, თუ რამდენად აკმაყოფილებენ ამ სტანდარტს, ან არ აკმაყოფილებენ. ეს მათი გასარკვევი საკითხია, თუმცა აკადემიური სივრცე თავისუფალი უნდა იყოს, ადამიანების და პოლიტიკური პარტიების იდეოლოგიზაცია არ უნდა ვრცელდებოდეს. ჩვენ ვხედავთ, რომ პოლიტიკური პარტიების ლიდერები სხვადასხვა სასწავლებლებში დადიან და საკუთარ პოლიტიკური იდეოლოგიას ავრცელებენ. განსხვავებული აზრის დევნა ის ფაშისტური კამპანია არის, რომელსაც ყოფილი სახალხო დამცველი, თუ სხვა ასეთი პირები აწარმოებენ, რომლებიც პირდაპირ გარიყვისკენ მოუწოდებენ. აი, ეს ჩვენს ხელისგულზე დევს, ეს თქვენს თვალწინ არის“, - განაცხადა პაპუაშვილმა.