ხატია დეკანოიძე უმრავლესობის დეპუტატების მიერ მანდატის შესაძლო დატოვებაზე - გამბედაობა იქნებოდა დარჩნენ პარლამენტში და „ქართული ოცნების“ და იმ პოლიტიკის წინააღმდეგ იბრძოლონ, რომელიც ანტიდასავლურია

ჩემი პოზიცია იქნებოდა შემდეგი: მათ მანდატი და პარლამენტი კი არ უნდა დატოვონ, გამბედაობა იქნებოდა დარჩნენ პარლამენტში და „ქართული ოცნების“ წინააღმდეგ იბრძოლონ, მათ შორის იმ პოლიტიკის წინააღმდეგ, რომელიც ანტიდასავლურია, - ამის შესახებ „ნაციონალური მოძრაობის“ ერთ-ერთმა ლიდერმა, ხატია დეკანოიძემ ჟურნალისტებს განუცხადა, როდესაც უპასუხა კითხავს გავრცელებულ ინფორმაციაზე, რომ „ქართული ოცნების“ რამდენიმე დეპუტატმა შესაძლოა პარლამენტი დატოვოს.

ხატია დეკანოიძის თქმით, მას არ აქვს ინფორმაცია, თუ ვინ შეიძლება დატოვოს მმართველი პარტიიდან პარლამენტი, თუმცა მიიჩნევს, რომ პარლამენტში დარჩენა მეტი გამბედაობა იქნებოდა.

„ამიტომ, თუ მათ მიაჩნიათ, ქვეყნის გადარჩენის გზა, როგორც დასავლური ვექტორის შეკავება და შენარჩუნებაა, მაშინ ამაში ყველამ თავისი წვლილი უნდა შეიტანოს, რადგან პასუხისმგებლობა მათაც აქვთ“,- განაცხადა ხატია დეკანოიძემ.

როგორც მან აღნიშნა, მანდატების დატოვება დასავლური ვექტორის შენარჩუნებისთვის საჭირო პასუხისმგებლობის თავიდან აცილება იქნება.

„მანდატის დატოვებით პასუხისმგებლობას ვერ აირიდებენ. პასუხისმგებლობა შეიძლება შეინარჩუნონ პარლამენტში და იყვნენ საქართველოს დასავლური ორიენტაციის დამცველები. სხვა შემთხვევაში, მანდატი დატოვა, წავიდა და პოლიტიკიდან გაქრა, რა თქმა უნდა, ეს გამბედაობას ვერ ადასტურებს“,- განაცხადა დეკანოიძემ.

ამასთან, მან ისაუბრა იმ 12 პუნქტის შესრულების აუცილებლობაზე, რომელმაც ქვეყანამ ევროკავშირისგან მიიღო.

როგორც დეკანოიძემ აღნიშნა, ვენეციის კომისიამ საქართველოს ხელისუფლებას უთხრა, თუ რა სჭირდება სასამართლოს იმისთვის, რომ ქვეყანამ კანდიდატის სტატუსი მიიღოს, წინააღმდეგ შემთხვევაში კი, სტატუსს ვერ მიიღებს, ამიტომ, დეკანოიძის თქმით, პირველ რიგში, საჭიროა ანტიდასავლური და ანტიუკრაინული პროპაგანდის შეწყვეტა.

„რა თქმა უნდა, საჭიროა პოლიტიკური ნების გამომჟღავნება, რომ ნებისმიერი ინიციატივა, რომელიც ოპოზიციას აქამდე გვქონდა, მათ შორის სასამართლოსთან, დეოლიგარქიზაციასთან და ზოგადად, კანონმდებლობასთან მიმართებაში, კვლავ იყოს განხილული და რეალობაში მოყვანილი. ამიტომ, მუშაობაზე ჩვენ უარი არ გვითქვამს, პირიქით, ახლა, სასიცოცხლოდ მნიშვნელოვანია ძალიან სერიოზული ზეწოლა მმართველ გუნდზე იმისათვის, რომ რეკომენდაციები შესრულდეს“, - განაცხადა ხატია დეკანოიძემ.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს