ჯობს ისინი ["ქართული ოცნების" დეპუტატები] ბრძოლაში დარჩნენ, ჯობს ეს მანდატები მათ არ დაუტოვონ სიაში მომლოდინე რეაქციონისტ "ქოცებს", რომლებიც მზად არიან ეს მანდატები აიღონ და რუსულ კანონს მეორედ, მესამედ და მეათედ მიაჭირონ ხელი, - ამის შესახებ "სტრატეგია აღმაშენებლის" ერთ-ერთმა ლიდერმა, სერგო ჩიხლაძემ "ქართული ოცნების" დეპუტატების მხრიდან პარლამენტის შესაძლო დატოვებასთან დაკავშირებით განაცხადა.

მისივე თქმით, უმჯობესია "ქართული ოცნების" დეპუტატებმა, რომლებზეც ინფორმაცია ვრცელდება, რომ პარლამენტის დატოვებას აპირებენ, უმრავლესობა დატოვონ და მანდატები შეინარჩუნონ.

„ქართული ოცნების" რღვევა შიგნიდან დაწყებულია. დეპუტატები გარბიან. უფრო სწორად, აგდებენ, პირდაპირ რომ ვთქვათ. ამ დეპუტატებს მინდა ვუთხრა, რომ უბრალოდ განრიდება არ ნიშნავს, რომ მათ ეს ტალახი მოიწმინდეს. ჯობს ისინი ბრძოლაში დარჩნენ, ჯობს ეს მანდატები მათ არ დაუტოვონ სიაში მომლოდინე რეაქციონისტ „ქოცებს“, რომლებიც მზად არიან ეს მანდატები აიღონ და რუსულ კანონს მეორედ, მესამედ და მეათედ მიაჭირონ ხელი. ჯობს ეს ოთხი დეპუტატი, რომლებზეც არის საუბარი, დარჩნენ პარლამენტში და უმრავლესობა დატოვონ, ანუ უმრავლესობას მოაკლონ კიდევ ის 4 ხმა და არა პირიქით, აჩუქონ ეს ხმები კიდევ უფრო შავრაზმელ „ქოცებს“, - განაცხადა ჩიხლაძემ.