ვარშავის უსაფრთხოების ფორუმის დემოკრატიული ქსელის მუშაობის ფარგლებში, „ჯეოქეისის“ მკვლევარი და საერთაშორისო მდივანი, ნიკოლოზ ხატიაშვილი უკრაინაში იმყოფებოდა. ინფორმაციას „ჯეოქეისი“ ავრცელებს.

მათივე ცნობით, ვიზიტისას, დემოკრატიული ქსელის წარმომადგენლებმა და უკრაინელმა ექსპერტებმა უკრაინაში მიმდინარე ომის შედეგებთან და რეგიონის მომავალ უსაფრთხოებასთან დაკავშირებით ერთობლივი დისკუსია გამართეს.

ყურადღება უკრაინაში ომის დასრულების შესაძლო სცენარებზე და ახალი საერთაშორისო უსაფრთხოების მექანიზმების საჭიროებაზე გამახვილდა, განსაკუთრებით ისეთი ქვეყნებისთვის, რომლებსაც საერთაშორისო უსაფრთხოების ქოლგა არ იცავს.

ვიზიტის ფარგლებში, ნიკოლოზ ხატიაშვილი და ქსელის წევრები ოფიცერთა სახლს, მეომრის სახლს ესტუმრნენ და პატივი მიაგეს ლიჩაკოვის სასაფლაოზე მდებარე იმ უკრაინელი გმირი ჯარისკაცების საფლავებს, რომლებიც რუსეთთან ომში დაიღუპნენ.

„მქონდა შესაძლებლობა, რომ ჩემს კოლეგებთან ერთად, უკრაინაში ჩავსულიყავით. ძალიან საინტერესო შეხვედრები გავმართეთ ექსპერტებთან, სამხედროებთან და აქტივისტებთან, რომლებიც უკრაინის სუვერენიტეტისა და ტერიტორიული მთლიანობის დაცვაში მნიშვნელოვანი როლს თამაშობენ. მათ პირადად გაგვაცნეს უკრაინაში არსებული ვითარება, როგორც ფრონტის ხაზზე, ასევე, პოლიტიკურ განზომილებაში და ომის დასრულებასთან დაკავშირებით თავისი ხედვები გაგვიზიარეს.

უკრაინელებმა დიდი მადლიერება გამოხატეს საქართველოს მიმართ, როგორც ჰუმანიტარული დახმარების მიწოდების, ასევე, საქართველოში უკრაინელი ლტოლვილების დახმარების და საერთაშორისო ფორმატებში დიპლომატიური და პოლიტიკური მხარდაჭერის გამო. ვფიქრობ, რომ დასავლეთის მხარდაჭერის გაგრძელებისა და სამხედრო შეიარაღების მიწოდების გაზრდის შემთხვევაში, უკრაინა ქვეყნის სუვერენიტეტისა და ტერიტორიული მთლიანობისათვის ბრძოლის პროცესში მეტი ხელშესახები შედეგებისა და წარმატების მიღწევას შეძლებს. ამ კონტექსტში ხაზგასასმელია, რომ ჰააგის სასამართლოს მიერ გაცემული რუსეთის პრეზიდენტის დაკავების ორდერი, უკრაინისთვის საერთაშორისო ასპარეზზეც ერთ-ერთი მნიშვნელოვანი ბერკეტი იქნება,“ - განაცხადა ნიკოლოზ ხატიაშვილმა.