თუ სასწრაფოდ არ გაატარებს ხელისუფლება რეფორმებს, ვერანაირ კანდიდატის სტატუსს ვერ მიიღებს ქვეყანა და მათ მოენატრებათ ის, რაც 7-8 მარტს ნახეს ქუჩებში - ყველას, ვინც გაბედავს ევროპული მომავლის ქვეყნისთვის მოპარვას, უმკაცრესად მოსთხოვენ პასუხს,- ამის შესახებ „ლელოს“ დეპუტატმა სალომე სამადაშვილმა ჟურნალისტებთან განაცხადა.

სამადაშვილი მმართველ გუნდს ურჩევს, ყურადღებით წაიკითხონ აშშ-ის სახელმწიფო დეპარტამენტის ანგარიში ევროკავშირის 12 რეკომენდაციასთან ერთად და დაიწყონ ამ რეკომენდაციების შესრულება.

სამადაშვილი აცხადებს, რომ ანგარიშში ნათლად ჩანს, რომ აქამდე არაფერი გაკეთებულა.

„ქართული ოცნება“ თუ სასწრაფოდ არ დაიწყებს იმ რეფორმების გატარებას, რასაც ითხოვენ დასავლელი პარტნიორები, არ დაიწყებს სასამართლო კლანის დაშლას, არ დაანებებს თავს თავისუფალი მედიის დევნას, არ გადადგამს კონკრეტულ ნაბიჯებს, მაგალითად ისეთს, როგორიც არის გვარამიას გათავისუფლება, რაც აჩვენებს პარტნიორებს, რომ შეიძლება, ცდებოდა ეს ხელისუფლება, მაგრამ დღეს ცდილობს, სხვანაირად გააკეთოს რაღაც, ამას ყველაფერს თუ არ გააკეთებს „ქართული ოცნება“ არანაირ კანდიდატის სტატუსს არ მიიღებს ეს ქვეყანა და „ქართულ ოცნებას“ მოენატრება ის, რაც მათ ნახეს 7-8 მარტს თბილისის ქუჩებში, რადგან ქართველმა ხალხმა ძალიან ნათლად ცხადი გახადა ყველასთვის, რომ ჩვენი არჩევანი არის ევროპული და ყველას, ვინც გაბედავს რუსეთის დავალებით ევროპული მომავლის ქვეყნისთვის მოპარვას, ქართველი ხალხი უმკაცრესად მოსთხოვს პასუხს. ამიტომ ყურადღებით წაიკითხონ აშშ- ის სახელმწიფო დეპარტამენტის ანგარიში და 12 მოთხოვნა ევროკავშირის და დღეიდან დაიწყონ მათი შესრულება რადგან დღემდე ამისთვის არაფერი გაუკეთებიათ“, - განაცხადა სამადაშვილმა.