ანალენა ბერბოკის ვიზიტი არის ცხადი მხარდაჭერა ჩვენი ევროპული მომავლის, დემოკრატიის, უსაფრთხოების. სამწუხაროა, რომ მის ვიზიტს ურცხვად დახვდა რუსული გზავნილებით რუსეთის საოკუპაციო რეჟიმი, რომელმაც თავდასხმა სტუმარზე მის ჩამოსვლამდეც კი დაიწყო,- ამის შესახებ „ლელოს“ დეპუტატმა სალომე სამადაშვილმა განაცხადა.

მისი თქმით, ბერბოკმა ვიზიტი არასამთავრობო სექტორთან შეხვედრით დაიწყო, რაც აჩვენებს იმას, თუ როგორ ხედავს გერმანიის ხელისუფლება ქვეყანაში არსებულ ვითარებას.

„გერმანიის საგარეო საქმეთა მინისტრის ჩამოსვლა არის ცხადი მხარდაჭერა ჩვენი ევროპული მომავლის, დემოკრატიის, უსაფრთხოების. მინდა ხაზგასმით ვთქვა, რომ შეხვედრები დაიწყო სწორედ არასამთავრობო ორგანიზაციებთან შეხვედრით და ეს არის მნიშვნელოვანი გზავნილი, თუ როგორ აფასებს გერმანიის ხელისუფლება ქვეყანაში შექმნილ ვითარებას. სამწუხაროა, რომ მის ვიზიტს დახვდა ურცხვად რუსული გზავნილებით რუსეთის საოკუპაციო რეჟიმი, რომელმაც თავდასხმა დაიწყო სტუმარზე მის ჩამოსვლამდეც კი და განაცხადა, რომ ის ინფორმირებული არაა, რომ „ბოლშევიკების“ გზავნილებით საუბრობს და ა.შ. ეს ყველაფერი გვაჩვენებს, რომ ევროკავშირში ქართველ ხალხს ჰყავს ძალიან მყარი მოკავშირე, მაგრამ არ მოიაზრებენ ამ ხელისუფლებას, რომელიც ქვეყანას მართავს, არც ხალხის ინტერესების გამომხატველად და არც პარტნიორად, რომელსაც შეიძლება ენდო საკუთარი სტრატეგიული ამოცანების განხორციელებაში,“ - განაცხადა სამადაშვილმა.

ცნობისთვის, საქართველოს გერმანიის საგარეო საქმეთა მინისტრი ანალენა ბერბოკი ეწვია. ის უკვე შეხვდა არასამთავრობო სექტორის წარმომადგენლებს. ვიზიტის ფარგლებში დაგეგმილია შეხვედრები საქართველოს ხელისუფლების პირველ პირებთან, მათ შორის პრეზიდენტ სალომე ზურაბიშვილსა და პრემიერ-მინისტრ ირაკლი ღარიბაშვილთან. შეხვედრები გაიმართება ოპოზიციის წარმომადგენლებთანაც. გერმანიის საგარეო უწყების ხელმძღვანელი ქართველ სტუდენტებსაც ეწვევა. ვიზიტის დღის წესრიგშია ასევე, „სამხრეთ ოსეთის“ სეპარატისტულ რეგიონთან არსებულ ადმინისტრაციულ ხაზთან გამგზავრება და ევროკავშირის სადამკვირვებლო მისიის (EUMM) წარმომადგენლებთან საუბარი.