დღეს გერმანიის საგარეო საქმეთა მინისტრს ხვდებით, იმ სახელმწიფოს წარმომადგენელს, რომელმაც ჩვენ უსაფრთხოების სფეროში 1 300 000 ევრო გამოგვიყო და აქ მათ კრიმინალების მფარველს ეძახით. როგორ აპირებთ კრიმინალების მფარველ მინისტრთან საუბარს, საინტერესოა, - ამ კითხვით პარლამენტის დამოუკიდებელმა დეპუტატმა, თამარ კორძაიამ საქართველოს პრემიერ-მინისტრს, ირაკლი ღარიბაშვილს პარლამენტის პლენარულ სხდომაზე მიმართა.

როგორც თამარ კორძაიამ აღნიშნა, ის, რომ საქართველოს დღეს ევროკავშირის წევრობის კანდიდატის სტატუსი არ აქვს, ეს იმ განცხადებების ბრალია, რასაც პრემიერ-მინისტრი პარლამენტის ტრიბუნიდან აკეთებს.

მისივე თქმით, ირაკლი ღარიბაშვილის წერილობითი დოკუმენტები მის ზეპირ საუბარს არ ემთხვევა.

„ბატონო პრემიერო, თქვენი წერილობითი დოკუმენტი, უკვე მერამდენედ, თქვენს ზეპირ საუბარს აცდენილია. მე-15 გვერდზე ამბობთ, რომ ევროპისთვის, უსაფრთხოების სფეროში, სანდო პარტნიორები ვართ. მე-20 და 21-ე გვერდზე ძალიან დეტალურად წერთ, თუ რა ტიპის პარტნიორობა გაქვთ ნატოსა და ევროკავშირთან. ერთ-ერთ პუნქტად მითითებული გაქვთ, რა ფინანსურ დახმარებას იღებთ იმ ევროპისგან, რომელსაც ამ წუთას კრიმინალური უწოდეთ.

დღეს გერმანიის საგარეო საქმეთა მინისტრს ხვდებით, იმ სახელმწიფოს წარმომადგენელს, რომელმაც ჩვენ უსაფრთხოების სფეროში 1 300 000 ევრო გამოგვიყო და აქ მათ კრიმინალების მფარველს ეძახით. როგორ აპირებთ კრიმინალების მფარველ მინისტრთან საუბარს, საინტერესოა. როდესაც საუბრობთ, რომ ჩვენ სტატუსს მოლდოვასა და უკრაინაზე მეტად ვიმსახურებდით, მე გეთანხმებით, მაგრამ იქნებ დაფიქრდეთ იმაზე, რატომ არ გვაქვს სტატუსი. იქნებ, ეს ისეთი განცხადებების გამოა, როგორსაც ამ ტრიბუნიდან თქვენ ამ წუთას აკეთებდით.

ევროპელი პარტნიორები გვთხოვენ, რომ არ მივიღოთ რუსული კანონი და თქვენ ამას საქართველოს მოქალაქეების მხრიდან დეზინფორმაციას უწოდებთ. ეს არის იმის მიზეზი, თუ რატომ არ გვაქვს დღეს კანდიდატის სტატუსი“, - განაცხადა თამარ კორძაიამ.