პოლიტიკური კამათის დონე, ორივე მხრიდან ძალიან დაბალი იყო. ნუ ექნება კმაყოფილების გრძნობა ნურც ერთ მხარეს, - ასე შეაფასა პოლიტოლოგმა რამაზ საყვარელიძემ დღეს პარლამენტში პრემიერ-მინისტრის ირაკლი ღარიბაშვილის ინტერპელაციის წესით მოსმენა.

როგორც პოლიტოლოგმა „პალიტრანიუსის“ გადაცემა „360 გრადუსი“ განაცხადა, საქართველოში პოლიტიკური პროცესები ლანძღვამ ჩაანაცვლა.

„რა თქმა უნდა, ეს არის იყო ის ენა, რომლითაც პრემიერს უნდა ელაპარაკა პარლამენტში. მაგრამ მანამდე ოპოზიცია ამბობდა, რომ „ქართული ოცნება“ რუსეთის ხელისუფლებაა. ორივე მხარე ერთმანეთს რუსეთუმეობას აბრალებს. პოლიტიკური კამათის დონე, ორივე მხრიდან ძალიან დაბალი იყო. ნუ ექნება კმაყოფილების გრძნობა ნურც ერთ მხარეს.

როცა ერთმანეთს ეკამათებიან ვერ ზომავენ და აღრევენ ხოლმე ქცევის ნორმებს. ჩვენთან პოლიტიკური პროცესი ჩაანაცვლა ლანძღვამ. აღიქმება, რომ მეტოქეს მოუგე თუ შენ უფრო მწარე ფრაზა უთხარი. ამ დროს პოლიტიკაში ძირითადად უგებენ ლოგიკით, არგუმენტებით, ფაქტებით“,- განაცხადა საყვარელიძემ.

მისივე თქმით, საქართველოს უსაფრთხოების საკითხები საჯარო განხილვის საგანი არ უნდა იყოს.

„ამისთვის არსებობს სპეციალური ჯგუფი. რა საჭიროა თავდაცვის საკითხებზე საჯარო განხილვების მოწყობა.

მადლობა ღმერთს, რომ დღეს პარლამენტში საქმიანი განხილვა არ იყო. იმიტომ, რომ მაშინ საქართველოს მოუწევდა ლაპარაკი, თუ როგორია შეიარაღების წყაროები, ვის თვლის მტრად... არ შეიძლება იმის თქმა ვის თვლი მტრად, როდესაც ტერიტორიებს 20% წაღებულია და 40 კილომეტრში დგას ტანკები. ის, რომ რუსეთი შენთვის მტერია ეს ჩანს უკრაინის მხარდაჭერილ დოკუმენტებში, იმაში, რომ საქართველო ფაქტობრივად უარს ამბობს რუსეთთან დიპლომატიური ურთიერთობების აღდგენაზე და ა.შ.“,- განაცხადა საყვარელიძემ.