თუ კანდიდატის სტატუსი ვერ მივიღეთ, „ქართული ოცნების" პასუხისმგებლობის საკითხი უნდა დადგეს - როცა მოსახლეობის 80 პროცენტის ნების რეალიზება არ ხდება, ეს ნიშნავს დელეგიტიმაციას, - ამის შესახებ ჟურნალისტებთან "სტრატეგია აღმაშენებლის" წევრმა პაატა მანჯგალაძემ განაცხადა.

მისი თქმით, სტატუსის საბოტაჟია არამხოლოდ რუსული კანონი, არამედ სასამართლო რეფორმაზე უარის თქმა და სხვა რეკომენდაციების შესრულების ჩაგდებაც, "ამიტომ „ქართულ ოცნებაზე" ზეწოლაა საჭირო".

„ქართული ოცნება" თავისით არაფერს დათმობს, დათმობის პრაქტიკა არსებობს მარტო მაშინ, როცა ადამიანები გამოდიან ქუჩაში. ჩვენ ვფიქრობთ, რომ ოპოზიციის შიგნით კოორდინაციაზე უნდა იყოს საუბარი და ეს კოორდინაცია დაწყებულია. უნდა ჩამოვყალიბდეთ, როგორ ვახდენთ ზეწოლას 12 რეკომენდაციის შესრულებაზე. ევროპელები აძლევენ ვადას "ქართულ ოცნებას", შეფასება ოქტომბერში იქნება. ღმერთმა ნუ ქნას და მოხდა ისე, რომ "ქართულმა ოცნებამ" არ გაიზიარა არავის აზრი და ვერ მივიღეთ კანდიდატის სტატუსი, მაშინ ნამდვილად უნდა დადგეს "ქართული ოცნების" პასუხისმგებლობის საკითხი. არეულობას და ქაოსს კი არ ვგულისხმობ, მარტივად, ხალხი გამოვა ქუჩაში და მოითხოვს ვადამდელს. როცა მოსახლეობის 80 პროცენტის ნების რეალიზება არ ხდება, ეს ნიშნავს დელეგიტიმაციას,"- განაცხადა მანჯგალაძემ.