პოლიტიკური სპეკულაციებისთვის ეთნიკური, რელიგიური შუღლის თემების გამოყენება ყველაზე დიდი ამორალობა და ამ ქვეყნის ძალიან დიდი მტრობაა, - ამის შესახებ განცხადება პარლამენტის ადამიანის უფლებათა დაცვის კომიტეტის სხდომაზე, კომიტეტის თავმჯდომარემ მიხეილ სარჯველაძემ გააკეთა.

სარჯველაძის შეფასებით, ბოლო ხანებში გახშირდა სპეკულაციები ისეთ თემებზე, რომელიც თითოეული დეპუტატისგან და ადამიანისგან, ვინც ამ ქვეყნის გულშემატკივარია, მეტ პასუხისმგებლობას მოითხოვს.

„ადამიანი ავკარგიანია იმისგან დამოუკიდებლად თუ ვინ რომელი აღმსარებლობისაა, ვინ რომელი ეთნიკური ჯგუფის წარმომადგენელია. ჩემი პირადი პატივისცემა საქართველოში უმცირესობების წარმომადგენლებს - გინდ ეთნიკური, გინდ რელიგიური უმცირესობა. ჩემი ღრმა პატივისცემა და დასტური მთლიანად კომიტეტისგან და პარლამენტისგან“, - განაცხადა სარჯველაძემ კომიტეტის სხდომაზე.