ხელისუფლებას იმ ადამიანების შეკრების ეშინია, ვისთვისაც პროდასავლური არჩევანი მნიშვნელოვანია, - ამის შესახებ „ერთიანი ნაციონალური მოძრაობის“, აჭარის უმაღლესი საბჭოს წევრმა, გია აბულაძემ ბრიფინგზე განაცხადა.

მისივე თქმით, მიუხედავად ხელისუფლების წინააღმდეგობისა, ბათუმში, 29 მარტს დაგეგმილი შეხვედრა მაინც გაიმართება.

„როგორც საზოგადოებისთვის არის ცნობილი, ხვალ დაგეგმილი გვქონდა შეხვედრა ჩვენს მხარდამჭერებთან. ჩვენ წერილობით მივმართეთ ბათუმის მერიას, რომ გამოეყოთ საზაფხულო თეატრის დარბაზი. სამწუხაროდ, ჩვენ ამაზე პასუხი არ მიგვიღია და საკრებულოს წევრებს უთხრეს, რომ ამ დარბაზის გამოყენება ვერ მოხერხდება და რეალურად გვითხრეს უარი. სამწუხაროა, რომ, როგორც ჩანს, ხელისუფლებას აშინებს იმ ადამიანების შეკრება, ვისთვისაც პროდასავლური არჩევანი მნიშვნელოვანია, მაგრამ მე მინდა ვუთხრა მათ, რომ ჩვენ აუცილებლად შევიკრიბებით, ეს იქნება პირველ აპრილს, „თავისუფლების კვარტალში“. ეს შეკრება აუცილებლად შედგება, მიუხედავად იმისა, ხელისუფლებას ამ შეკრების შიში ექნება თუ არა“, - განაცხადა გია აბულაძემ.