მიხეილ სააკაშვილი გათავისუფლების იმედად თვითდაზიანებას აგრძელებს - სისტემა შექმნა ადამიანმა, რომელიც აწამებდა და კლავდა ციხეში და ახლა სახელმწიფო ეხვეწება, რომ შეჭამოს საჭმელი, რომელიც თან მას შეუძლია, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ ჟურნალისტებს განუცხადა.

მისივე თქმით, საქართველოს ყოფილ პრეზიდენტი მიხეილ სააკაშვილი მიზანმიმართულად არც ჭამს და არც გადასხმებს იკეთებს.

„ერთი პროცენტით დაუშვით, რომ მართლა ვერ ჭამს. არადა, ექიმები ამბობენ, რომ შეუძლია ჭამოს და არ ჭამს, ანუ თვითდაზიანებას ეწევა. ანუ ეს რომ არ დაიჯერონ „ნაცმოძრაობის“ აქტივისტებმა და გჯერა, რომ მართლაც არ შეუძლია ჭამა, კითხვა მარტივია - რატომ არ იღებს სხვა სამედიცინო მომსახურებას? მაგალითად, გადასხმებით რატომ არ იღებს იმ კალორაჟს? შესაბამისად, ეს არის მთავარი მტკიცებულება იმის, რომ ის გათავისუფლების იმედად თვითდაზიანებას აგრძელებს. ყველას მარტივად შეუძლია დასვას კითხვა, რატომ არ იკეთებს გადასხმას? გადასხმას გაიკეთებს და პრობლემა არ ექნება, კიდეც რომ ვერ ჭამდეს, მაგრამ სინამდვილეში, ჭამაც შეუძლია და კალორაჟს არ იღებს თვითდაზიანების მიზნით. მსოფლიოში არ არსებობს პენიტენციური სისტემა, რომელიც თვითდაზიანებაზე რეაგირებს, მაგალითად, გათავისუფლებით. გამოსავალია ჭამოს, ვეხვეწებით. სისტემა შექმნა ადამიანმა, რომელიც აწამებდა და კლავდა ციხეში და ახლა სახელმწიფო ეხვეწება, რომ შეჭამოს საჭმელი, რომელიც თან მას შეუძლია“, - განაცხადა მამუკა მდინარაძემ.

ამასთან, მამუკა მდინარაძემ „ნაციონალური მოძრაობის“ საპარლამენტო ცხოვრებაში დაბრუნებაც შეაფასა.

„რეკომენდაციების დიდი უმრავლესობა უკვე შესრულებულია და მათ ფორმალური მონაწილეობაც კი არ მიუღიათ ამაში. ახლა აანონსებენ აქციებს, აანონსებენ აქტივობებს და მოთხოვნა მათი არის, რომ შევასრულოთ რეკომენდაციები. რამდენად გულწრფელები არიან ისინი ამ მოთხოვნებში, თავად განსაჯეთ, მაშინ, როცა მათ სამუშაო ჯგუფებშიც კი არ მიუღიათ მონაწილეობა“, - განაცხადა მდინარაძემ.