ამ ახალგაზრდის დაკავება შერჩევითი სამართალია იმ რეჟიმისგან, რომელიც პუტინისტური ძალადობის ორგანიზატორებს არ სჯის და პუტინისტ მოძალადეებს, რომელიც პოლიციას ქვებს ესვრის ხოლმე, უბრალოდ აჯარიმებს, - ასე გამოეხმაურა „ევროპული საქართველოს“ თავმჯდომარე, გიგა ბოკერია პოლიციელზე თავდასხმის ბრალდებით მარტის აქციების მონაწილე ლაზარე გრიგორიადისის დაკავებას.

მისი თქმით, ყოველგვარი მტკიცებულებების გასაჯაროვების გარეშე დაკავებული შეირჩა იმ ნიშნით, რომ ჩათვალეს, მისი დემონიზება ადვილი იქნებოდა.

„აი, ამ ამაზრზენ მეთოდს იყენებენ, ამის პირდაპირი დასტურია ამ სამარცხვინო ადამიანის, ირაკლი კობახიძის სამარცხვინო განცხადება“, - განაცხადა ბოკერიამ.

შეგახსენებთ, შინაგან საქმეთა სამინისტროს განცხადებით, პოლიციელზე თავდასხმისა და ნივთის დაზიანების ფაქტებზე დააკავეს პირი, რომელმაც „აქციაზე პოლიციელებს ესროლა ქვები და ე.წ. მოლოტოვის კოქტეილები, ცეცხლი წაუკიდა ავტომობილს“.

ამასთან დაკავშირებით „ქართული ოცნების“ თავმჯდომარე ირაკლი კობახიძემ განაცხადა, რომ დაკავებული პირი „დაკავშირებულია ბოლშევიკურ „ტროიკასთან“, რომელიც არის ვაშაძე-ჯაფარიძე-ხოშტარიას ერთობა“.