სიმართლე ქართველი ხალხისთვის - ეს არის ჩვენი მოლოდინი საქართველოს პრეზიდენტისგან, - ამის შესახებ ჟურნალისტებს „ლელოს“ დეპუტატმა სალომე სამადაშვილმა განუცხადა.

როგორც სამადაშვილმა აღნიშნა, პრეზიდენტის პარლამენტში მოხსენებით გამოსვლა ემთხვევა ისტორიულ თარიღს, როცა ქვეყანამ დამოუკიდებელი სახელმწიფოს შექმნა აირჩია.

"იმედი მაქვს, რომ ამ ისტორიულ თარიღზე პრეზიდენტი პარლამენტის ტრიბუნას გამოიყენებს იმისთვის, რომ თანამოქალაქეებს შეახსენოს რა ისტორიული გამოწვევების წინაშეა ქვეყანა.

32 წლის წინ, როცა დამოუკიდებელ სახელმწიფოს ვირჩევდით, ვერც კი ვიოცნებებდით, რომ ევროკავშირის კარი რეალურად გაგვეხსნებოდა. დღეს ეს კარი საქართველოსთვის გახსნილია და კარში "ქართული ოცნების" ხელისუფლება დგას, რომელიც თავისი პოლიტიკით კანდიდატი ქვეყნის სტატუსის მიღებას შეუძლებელს ხდის. იმედი მაქვს, პრეზიდენტი ქართველ ხალხს ამაზე სიმართლეს ეტყვის.

ასევე, იმედი მაქვს, რომ პრეზიდენტი ხალხს უსაფრთხოების გამოწვევებზე სიმართლეს ეტყვის, რომ მსოფლიოში ერთადერთი ომის პარტია არის რუსეთის რეჟიმი, ხოლო მისგან ქვეყნის დაცვა შესაძლებელია მხოლოდ მყარი ალიანსით დასავლეთთან და ტყუილია ის, რომ თითქოს დასავლეთი საქართველოსგან მეორე ფრონტის გახსნას ითხოვს", - განაცხადა სალომე სამადაშვილმა.