„ლელოს“ გენერალური მდივნის, ირაკლი კუპრაძის განცხადებით, სალომე ზურაბიშვილი პრეზიდენტის უფლებამოსილების განხორციელებას მხოლოდ დღეს შეუდგა.

როგორც მან აღნიშნა, „ლელოს” და პრეზიდენტის ხედვები ასე ცხადად პირველად გადაიკვეთა.

მისივე თქმით, საზოგადოება პრეზიდენტისგან რეალურ ნაბიჯებსა და საერთაშორისო პარტნიორებთან დაუღალავ შრომას ელის.

„სიმბოლურია, სწორედ 31 მარტს, დამოუკიდებლობის რეფერენდუმის დღეს, პრეზიდენტმა ყველაფერს დაარქვა საკუთარი სახელი. ზურაბიშვილს გააზრებული აქვს ევროპისკენ მიმავალ გზაზე მთავარი წინაღობის არსებობა, რასაც ,,ქართული ოცნება” ჰქვია, თუმცა საზოგადოება მისგან რეალურ ნაბიჯებს ელის, დაუღალავ შრომას საერთაშორისო პარტნიორებთან. მას დარჩენილი აქვს უმნიშვნელოვანესი ბერკეტი, შეწყალების სახით, რისი ამოქმედებაც საქართველოს ევროინტეგრაციის გზას გაუხსნის.

„ლელოს” და პრეზიდენტის ხედვები პირველად გადაიკვეთა ასე ცხადად. მზად ვართ, სალომე ზურაბიშვილთან ვითანამშრომლოთ დემოკრატიული ღირებულებების და ევროპული გზის დასაცავად”, - განაცხადა ირაკლი კუპრაძემ.