ამ ადამიანის ორიენტაცია - იქნება პოლიტიკური თუ ადამიანური, იზომება იმით, თუ რა ქმედება ჩაიდინა და სასამართლო რა შეფასებას მისცემს, - აღნიშნული განცხადება ჟურნალისტებთან დეპუტატმა ირაკლი ქადაგიშვილმა ლაზარე გრიგორიადისთან დაკავშირებით დასმული კითხვის პასუხად გააკეთა.

ქადაგიშვილი იმასაც ამბობს, რომ ლაზარე გრიგორიადისის თემის გარშემო “ე.წ. ტროიკა და მათთან აფილირებული გარკვეული ძალები რევანშისტული, ანარქისტული და რევოლუციური მიდგომის კულტივირებასაც ცდილობენ“ და სამართლებრივი ნაბიჯების აუცილებლობას ძირშივე გამორიცხავენ.

„ამ ადამიანს ბრალი სისხლის სამართლის დანაშაულის ჩადენაში ედება. ამიტომ გამოძიებას და სასამართლო პროცესს მივყვეთ. სასამართლო პროცესი არის ღია და იქ ყველაფერი ღიად ითქმება. გამომდინარე აქედან, მისი ორიენტაცია - იქნება პოლიტიკური თუ ადამიანური, იზომება იმით, რა ქმედება ჩაიდინა მან და სასამართლო რა შეფასებას მისცემს“, - განაცხადა ირაკლი ქადაგიშვილმა.

შეგახსენებთ, რომ ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლემ არსენ კალატოზიშვილმა მიიღო.

პროკურატურა გრიგორიადისის მიმართ ყველაზე მკაცრი აღკვეთის ღონისძიების შეფარდებას ითხოვდა, დაცვის მხარე კი მისი 10 000-ლარიანი გირაოს სანაცვლოდ გათავისუფლებას.