საქართველოს დამოუკიდებლობის აღდგენიდან 32 წლის შემდეგ ჩვენ ისევ ისტორიული გადაწყვეტილების წინაშე ვდგავართ. დამოუკიდებლობის მოპოვებიდან პირველად ვართ ასე ახლოს ჩვენს ისტორიულ მისიასთან - ევროპული ოჯახის კარი ჩვენთვის ღიაა, შევალთ თუ არა ამ კარში ეს მხოლოდ და მხოლოდ დამოკიდებულია 12 პუნქტის შესრულებაზე, - ამის შესახებ პარტია „ევროპელი დემოკრატების“ თავმჯდომარემ, პაატა დავითაიამ განაცხადა.

მისივე თქმით, თუ ახლა ვერ მოვახერხეთ ევროპულ ოჯახში დაბრუნება, ეს კარი შესაძლოა, ათწლეულები აღარ გაიხსნას.

„31 მარტი ჩვენი ისტორიის მნიშვნელოვანი დღეა, როდესაც საქართველოს დამოუკიდებლობის გადაწყვეტილებას რეფერენდუმის მონაწილეთა 98, 9%-მა დაუჭირა მხარი, რაც გახდა 9 აპრილის საქართველოს სახელმწიფოებრივი დამოუკიდებლობის აღდგენის აქტის საფუძველი.

წლების შემდეგ ჩვენ ისევ ისტორიული გადაწყვეტილების წინაშე ვდგავართ. საქართველოს ევროპულ ოჯახში დაბრუნება არის ჩვენი მოსახლეობის 85%-ის ნება, თუმცაღა საქართველოს ევროპული მომავალი ისტორიულად ყოველთვის იყო ჩვენი არჩევანი.

დღეს ევროპული ოჯახის კარი ჩვენთვის ღიაა, ამ კარში შესვლა დამოკიდებულია 12 პუნქტის შესრულებაზე. ხელისუფლებამ, ოპოზიციურმა პარტიებმა, საზოგადოებამ ყველაფერი უნდა გაკეთოს იმისთვის, რომ შევძლოთ ამ რეკომენდაციების შესრულება. სახელისუფლებო ძალას მართებს მეტი გონიერება და პასუხისმგებლობის აღება, რათა შეწყდეს დაპირისპირება და შესრულდეს რეკომენდაციები, რაც გახდება ევროკავშირის კანდიდატი ქვეყნის სტატუსის მიღების გარანტი. წინააღმდეგ შემთხვევაში ჩვენთვის ევროპული ოჯახის კარი, შესაძლოა, მინიმუმ ათწლეულები აღარ გაიხსნას, რასაც არც ისტორია გვაპატიებს და არც მომავალი თაობა“, - აცხადებს პაატა დავითაია.