„ლელო“ აქონდროპლაზიის დიაგნოზის მქონე პირთა საკითხზე პარლამენტის ადამიანის უფლებათა დაცვის კომიტეტში ჯანდაცვის მინისტრს ზურაბ აზარაშვილს იბარებს.

„ლელოს“ დეპუტატის, ანა ნაცვლიშვილის ინფორმაციით, აქონდროპლაზიის სამკურნალო მედიკამენტი „ვოზორიტიდი“, რომელსაც მსოფლიო 10 წელი ელოდა, მაღალგანვითარებული მედიცინის მქონე ქვეყნებში წარმატებით გამოიყენება, საქართველოში კი წელიწადზე მეტია არასრულწლოვანთა მშობლები ჯანდაცვის სამინისტროსთან კომუნიკაციას აწარმოებენ და მათგან ურთიერთგამომრიცხავ პასუხებს იღებენ.

ნაცვლიშვილის თქმით, ჯანდაცვის სისტემას ბავშვებისათვის, ვისაც აღნიშნული მედიკამენტი სჭირდებათ, არავითარი პასუხი არა აქვს, მათ მშობლებს ატყუებს და დროს წელავს.

ნაცვლიშვილი ადამიანის უფლებათა დაცვის კომიტეტში დაბარებული მინისტრისგან პასუხს შემდეგ კითხვებზე ითხოვს:

ფლობს თუ არა ჯანდაცვის სისტემა ინფორმაციას იმის შესახებ, საქართველოში მცხოვრებ რამდენ მოქალაქეს აქვს დასმული აქონდროპლაზიის დიაგნოზი და აქვთ თუ არა მათი სამედიცინო და სოციალური საჭიროებები შესწავლილი?

რა ტიპის სერვისებია ამ დიაგნოზის მქონე პირებისათვის საჭირო, რათა მათ შეძლონ სრულფასოვნად გაუმკლავდნენ დიაგნოზს? რა ტიპის ჯანდაცვის სერვისებია ხელმისაწვდომი, დღეის მდგომარეობით, ამ დიაგნოზის მქონე პაციენტებისათვის ქვეყანაში და რა სერვისებს ფარავს უნივერსალური ჯანდაცვის პაკეტი.

აქონდროპლაზიის სამკურნალო მედიკამენტს მინიჭებული აქვს FDA და EMA-ს ოფიციალური ლიცენზიები და არის ერთადერთი და უალტერნატივო ეფექტური მედიკამენტი მსოფლიოში აქონდროპლაზიის სამკურნალოდ. იგეგმება თუ არა ამ მედიკამენტის შემოტანა და პაციენტების ამ მედიკამენტით უზრუნველყოფა?

რა ნაბიჯები გადადგა აქამდე უწყებამ მედიკამენტის საქართველოს მოქალაქეებისათვის ხელმისაწვდომობის უზრუნველსაყოფად, მათ შორის საერთაშორისო დონეზე კომუნიკაციის თვალსაზრისით?