„ქართული ოცნების“ თავმჯდომარე, ირაკლი კობახიძე მიიჩნევს, რომ პარლამენტის თავმჯდომარის გადაწყვეტილება, რომ ოპოზიციონერ დეპუტატებს - ანა წითლიძეს და ანა ნაცვლიშვილს ლაზარე გრიგორიადისის ციხეში მონახულების უფლება არ მისცა, აბსოლუტურად რაციონალურია.

მისივე თქმით, ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებულის, ლაზარე გრიგორიადისის მონახულების უფლება ოჯახის წევრებსა და ადვოკატს აქვთ და ეს არის გარანტია იმისა, რომ პატიმრის უფლებები არ ირღვევა.

კობახიძის განცხადებით, ძალადობის, პოლიციელებისთვის „ცეცხლის წაკიდების“, სახელმწიფო ქონების დაზიანების ფაქტებზე სათანადო სამართლებრივი პასუხია საჭირო.

„რეალურად, სათანადო პირებს მაგალითად, ადვოკატს, ასევე, მე როგორც ვიცი, ოჯახის წევრებს, აქვთ პატიმრის მონახულების საშუალება და ეს არის გარანტია იმისა, რომ არავის უფლებები არ იქნება დარღვეული. რაც შეეხება ამ საქმის ჭარბ პოლიტიზებას - ამის არდაშვების ლეგიტიმური უფლება მგონი, ყველას აქვს და აქედან გამომდინარე, შესაბამისი გადაწყვეტილება არის აბსოლუტურად რაციონალური.

რაც შეეხება თანხმობის გარეშე თავის გადაპარსვას - მე მაქვს ინფორმაცია, რომ ეს არის ცალსახად ტყუილი, თუმცა ჯობს, რომ შესაბამისმა უწყებამ გააკეთოს ამასთან დაკავშირებით განმარტება. სამართლებრივ კვალიფიკაციას მე ამ საქმეს ვერ მივცემ, მე ვერ დავარღვევ უდანაშაულობის პრეზუმფციას, თუმცა რაც შეეხება ძალადობას, პოლიციელებისთვის ცეცხლის წაკიდებას, სახელმწიფო ქონების დაზიანებას და ა.შ., რა თქმა უნდა, ეს არის უმძიმესი მოვლენები და ამაზე საჭიროა სათანადო სამართლებრივი პასუხი, მათ შორის, პრევენციისთვის, რომ მომავალში ეს არ განმეორდეს“, - განაცხადა კობახიძემ.