ქალბატონო სალომე, თქვენ, თქვენს გამოსვლაში, ერთ-ერთ ბრალდებულს გადაუხადეთ მადლობა. მე მაინტერესებს, თუ დადასტურდა, რომ ამ ადამიანმა ბენზინი გადაასხა და ცეცხლი წაუკიდა სხვა ადამიანს, მადლობას გადაუხდით თუ არა,- ასე მიმართა საქართველოს პარლამენტის თავმჯდომარემ შალვა პაპუაშვილმა სხდომათა დარბაზში "ლელოს" დეპუტატს, სალომე სამადაშვილს, რომელმაც თავის გამოსვლაში საპროტესტო აქციების დროს პოლიციელზე თავდასხმასა და სხვისი ქონების განადგურებაში ბრალდებულ ლაზარე გრიგორიადისს მადლობა გადაუხადა.

პარლამენტის თავმჯდომარე დაინტერესდა, სალომე სამადაშვილი გადაუხდიდა თუ არა დაკავებულს მადლობას იმ შემთხვევაშიც, თუ დადასტურდებოდა, რომ მან სამართალდამცავის ცოცხლად დაწვა სცადა.

"მაინტერესებს, თუ დადასტურდა, რომ ამ ადამიანმა ბენზინი გადაასხა სხვა ადამიანს და ცეცხლი წაუკიდა, გადაუხდით თუ არა მადლობას ხვალ. მიპასუხეთ კი თუ არა. ანუ არ გაქვთ ამაზე პასუხი. ქალბატონო სალომე, კითხვის არსი ხომ გესმით? შეგიძლიათ გაიგოთ კითხვა. არ მპასუხობთ, თქვენი მთელი ფარისევლობა, სწორედ ამაშია, რომ ამ შეკითხვას არ პასუხობთ. თუ დადასტურდა, რომ მან ბენზინი გადაასხა და ცეცხლი წაუკიდა მეორე ადამიანს, თქვენ მაინც მადლობას გადაუხდით იმიტომ, რომ სწორად გადაასხა ბენზინი და სწორად წაუკიდა ცეცხლი,’’ - განაცხადა შალვა პაპუაშვილმა.