ისმის კითხვა, კონკრეტულად რა უნდა გააკეთოს მიხეილ სააკაშვილმა და მკურნალობის როგორი პროცესი არის საჭირო იმისთვის, რომ მისი ჯანმრთელობა გამოსწორდეს? - პასუხს ამაზე არავინ იძლევა და როცა ამ კითხვაზე პასუხი არ არის, ჩნდება საფუძვლიანი ეჭვი, რომ ყველანაირი განცხადება და დასკვნა პოლიტიკური კონიუნქტურით არის ნაკარნახევი, - ეს განცხადება ჟურნალისტებთან პარლამენტის პირველმა ვიცე-სპიკერმა გია ვოლსკიმ გააკეთა.

მისივე შეფასებით, „ორი აზრი არ არსებობს, რომ სახალხო დამცველის კონსილიუმი პოლიტიკურად მიკერძოებულია“.

ვოლსკის განცხადებით, „თუკი სააკაშვილის გარემოცვის, მისი ოჯახის მიმართ არ დადგება მკაცრი მოთხოვნა, ამ თემას პოზიტიური წინსვლა არ უწერია“.

„მიხეილ სააკაშვილთან დაკავშირებით პოლიტიკური თემა დღის წესრიგიდან საერთოდ მოიხსნა, რადგან დანაშაული აშკარაა. ახლა საუბარია იმაზე, რომ ამ თემის პოლიტიზირება მოიხსნას. რა საკვირველია, დღის წესრიგში მკურნალობის საკითხი დადგა. თუკი სააკაშვილის გარემოცვის, მისი ოჯახის მიმართ არ დადგება მკაცრი მოთხოვნა, ამ თემას პოზიტიური წინსვლა არ უწერია. საოცარია, რომ მთელი ის საზოგადოება, რომელიც ოპოზიციურად არის განწყობილი, მოხარულია, როცა მიხეილ სააკაშვილი ცუდადაა, ხოლო საზოგადოება, რომელიც „ნაციონალური მოძრაობის“ მიმართ ანტაგონისტურად არის განწყობილი, თუკი სააკაშვილი ჯანმრთელობა გამოსწორდება, ნებისმიერ განვითარება პოზიტიურად უყურებს“, - განაცხადა გია ვოლსკიმ.