9 აპრილს, 17:00 საათზე, რუსთაველის გამზირზე უნდა შევიკრიბოთ ყველანი, რათა საბოლოოდ დადგეს საქართველო იმ ლიანდაგებზე, რომელიც ევროპის დიდ ოჯახში შეგვიყვანს და არ მივცეთ „რუსულ ოცნებას“, რომ გადაგვიყვანოს ამ ლიანდაგებიდან,- ამის შესახებ „ერთიანი ნაციონალური მოძრაობის“ გენერალურმა მდივანმა, პეტრე ცისკარიშვილმა განაცხადა.

პეტრე ცისკარიშვილის თქმით, წინააღმდეგობის მოძრაობა კიდევ უნდა გაგრძელდეს, სანამ მიხეილ სააკაშვილი არის ციხეში.

„ძალიან ბევრი თქვენგანი 2003 წელსაც კი, 20 წლის წინ იყო „ნაციონალური მოძრაობის“, მიშა სააკაშვილის გვერდით და ებრძოდა მაშინდელ რეჟიმს, სადაც ჩვენ მოვიპოვეთ გამარჯვება. ასევე ძალიან ბევრი თქვენგანი გნახეთ თბილისში, როდესაც ჩვენს სხვა თანამებრძოლებთან ერთად, ჩვენს ახალგაზრდებთან ერთად, როდესაც დაგეშილი სპეცრაზმელების წინააღმდეგ მედგრად იდექით და ასევე საეტაპო გამარჯვებას მივაღწიეთ ჩვენ მაშინ, სადაც არ გავატანინეთ „რუსულ ოცნებას“ თავიანთი „რუსული კანონი“. ბრძოლა გრძელდება, წინააღმდეგობის მოძრაობა კიდევ უნდა გაგრძელდეს, რადგან სანამ მიხელ სააკაშვილი არის ციხეში, სანამ ამ რეჟიმმა ჩათვალა, რომ კლანჭები უნდა გამოაჩინოს და ისეთი მებრძოლი, პრინციპული, თავისუფლების მოყვარე ახალგაზრდა ბიჭი, როგორიც ლაზარეა, ციხეში გამოამწყვდიოს. სანამ ესე იქცევა რეჟიმი, ჩვენი ბრძოლა არ უნდა შეჩერდეს და აუცილებლად ასე იქნება, სწორედ ამიტომ მეგობრებო, ყველას გელოდებით 9 აპრილს, 17:00 საათზე, თბილისში და მომავალშიც მე დარწმუნებული ვარ, რომ ჩვენი ბევრი წინააღმდეგობის მოძრაობა გვექნება ჩვენ იმისათვის, რომ გავათავისუფლოთ პოლიტპატიმრები, პირველ რიგში მიშა სააკაშვილი და ნიკა გვარამია და შემდეგ დავამარცხოთ ეს რეჟიმი ყველგან ერთად, რადგან საქართველო ერთხელ და საბოლოოდ გავიდეს სამშვიდობოს და დადგეს იმ ლიანდაგებზე, რომელიც ევროპის დიდ ოჯახში შეგვიყვანს და არ მივცეთ „რუსულ ოცნებას“, რომ გადაგვიყვანოს ამ ლიანდაგებიდან“, - განაცხადა პეტრე ცისკარიშვილმა.

ინფორმაციისთვის, დღეს ქ. თელავში 9 აპრილის აქციის კამპანიის ფარგლებში, „ერთიანი ნაციონალური მოძრაობის“ აქცია გაიმართა, სადაც სიტყვით გამოვიდა პარტიის გენერალური მდივანი და ისაუბრა თუ რატომ არის 9 აპრილის აქცია მნიშვნელოვანი. ასევე მან აღნიშნა, რომ ბრძოლა უნდა გაგრძელდეს იქამდე, სანამ მიხეილ სააკაშვილი, ნიკა გვარამია და ახლა უკვე, მისი თქმით, კლასიკური გაგებით პოლიტპატიმარი - ლაზარე გრიგორიადისი არ იქნებიან თავისუფლები და მანამ, სანამ საქართველო არ გახდება ევროპული ოჯახის წევრი, რასაც „ქართული ოცნება“ მიზანმიმართულად უწყობს საბოტაჟს.