საქართველოს ევროპული მომავლისთვის, თავისუფლებისთვის, დამოუკიდებლობისთვის ხვალ, 9 აპრილს, 17:00 საათზე, რუსთაველის გამზირზე ვიკრიბებით, - ამის შესახებ „ერთიანი ნაციონალური მოძრაობის“ წევრები - ლევან მეტრეველის, გიორგი კაპანაძე და ლანა ღვინჯილია აცხადებენ.

„ერთიანი ნაციონალური მოძრაობის“ წევრებმა, 9 აპრილის კამპანიის ფარგლებში, დღეს, რუსთაველის მეტროს მიმდებარე ტერიტორიაზე 9 აპრილის საინფორმაციო ფლაერები დაარიგეს და მოსახლეობა აქციაზე მიიწვიეს.

მათი თქმით, ხვალ, 9 აპრილს, 17:00 საათზე უნდა იყოს რაც შეიძლება მეტი ადამიანი, რათა საქართველო არ დაბრუნდეს რუსულ ჭაობში;

„პრორუსული ხელისუფლება ჩვენს ქვეყანას ექაჩება უკან რუსული ჭაობისაკენ და თუ ჩვენ რუსეთში დაგვაბრუნეს ხელისუფლების წარმომადგენლებმა, დავკარგავთ დამოუკიდებლობასაც და თავისუფლებასაც. ამიტომ, ევროპული მომავლისათვის, დამოუკიდებლობისათვის, თავისუფლებისათვის, ყველანი ვიკრიბებით ხვალ, 9 აპრილს, 17:00 საათზე, რუსთაველზე იმისათვის, რომ დავიცვათ ჩვენი ქვეყნის ევროპული მომავალი“, - განაცხადა გიორგი კაპანაძემ.

ლევან მეტრეველის თქმით კი, ის ყველა თავის მეგობართან ერთად მიდის აქციაზე საქართველოს ევროპული მომავლის დასაცავად და პოლიტპატიმრების გასათავისუფლებლად.

„ჩემს ყველა მეგობართან ერთად მივდივარ 9 აპრილს ჩვენი ევროპული არჩევანის დასაცავად, პოლიტპატიმრების გასათავისუფლებლად, იმისათვის, რომ ჩვენი ქვეყანა ძალიან მალე იყოს თანამედროვე, სწორი და სამართლიანი ადგილი, ამიტომ, გიწვევთ ყველას მობრძანდეთ 9 აპრილს, 17:00 საათზე, რუსთაველის გამზირზე“, - განაცხადა ლევან მეტრეველმა.

ენმ-ის კიდევ ერთი წევრის, ლანა ღვინჯილიას განცხადებით, ხალხს ნამდვილად აქვს ძალა, რომ რაღაც შეცვალონ, ეს შანსი კი უნდა გამოვიყენოთ.

„ჩვენს მთავრობას ნამდვილად ეშინია ხალხის და ხალხს ნამდვილად აქვს ძალა, რომ რაღაც შეცვალონ, ეს შანსი კი უნდა გამოვიყენოთ. რაც უფრო მეტი ადამიანი იქნება 9 აპრილს რუსთაველის გამზირზე და რაც უფრო მკაფიოდ გამოხატავს თავის სურვილს, დაეხსნას რუსეთს და გახდეს ევროპული ოჯახის წევრი და საერთოდ გახდეს თავისუფალი ქვეყანა, მით უფრო მალე მივაღწევთ დასახულ მიზანს. ამიტომ, გელოდებით ყველას 9 აპრილს, 17:00 საათზე, რუსთაველის გამზირზე“, - განაცხადა ლანა ღვინჯილიამ.